اسلام آباد۔20فروری (اے پی پی):کابینہ کی اقتصادی رابطہ کمیٹی (ای سی سی) نے انٹرنیشنل کرکٹ کونسل (آئی سی سی) کو چیمپئنز ٹرافی 2025 کے سلسلے میں انکم ٹیکس سے استثنیٰ دینے کی منظوری دیدی ہے، کمیٹی نے پاکستان ایل این جی لمیٹڈ اور سوکار ٹریڈنگ کے درمیان ایل این جی فریم ورک معاہدے میں مزید تین سال کی توسیع کی منظوری بھی دیدی۔ کابینہ کی اقتصادی رابطہ کمیٹی (ای سی سی) کا اجلاس جمعرات کویہاں وزیر خزانہ و محصولات سینیٹر محمد اورنگزیب کی زیر صدارت منعقد ہوا۔
اجلاس میں اہم اقتصادی امور پر غور کیا گیا اور کلیدی فیصلوں کی منظوری دی گئی۔ اجلاس میں وفاقی وزیر پیٹرولیم مصدق مسعود ملک، وزیر صنعت و پیداوار رانا تنویر حسین، چیئرمین ایف بی آر، چیئرمین ایس ای سی پی، وفاقی سیکرٹریز اور متعلقہ وزارتوں و ڈویژنز کے سینئر افسران نے شرکت کی۔ اجلاس میں ریونیو ڈویژن کی جانب سے انٹرنیشنل کرکٹ کونسل (آئی سی سی) کو چیمپئنز ٹرافی 2025 کے سلسلے میں انکم ٹیکس سے استثنیٰ دینے کی سمری پیش کی گئی جس کی منظوری دیدی گئی، اجلاس کوبتایاگیا کہ یہ استثنیٰ بین الاقوامی کھیلوں کے مقابلوں کی میزبانی کے معیاری اصولوں کے مطابق ہے۔
پاکستان اور آئی سی سی کے درمیان طے شدہ معاہدے کے تحت آئی سی سی، اس کی ذیلی تنظیموں، عہدیداروں اور غیر مقیم مندوبین کی آمدنی پر کوئی ٹیکس یا کٹوتی نہیں ہوگی۔ تاہم پاکستان کرکٹ بورڈ (پی سی بی) اور دیگر مقامی ادارے اپنی آمدنی پر انکم ٹیکس کے پابند رہیں گے۔ اس استثنیٰ کا اطلاق سیلز ٹیکس اور فیڈرل ایکسائز ڈیوٹی (ایف ای ڈی) پر نہیں ہوگا۔ ٹیکس استثنیٰ سے قومی خزانے کو کسی نقصان کا سامنا نہیں ہوگا کیونکہ یہ ٹورنامنٹ کی میزبانی کے لیے ایک لازمی شرط ہے۔
اجلاس میں وزارت قومی غذائی تحفظ و تحقیق کی جانب سے کویت کو تجارتی بنیادوں پر بھیڑ بکریوں کی برآمد پر عائد پابندی ہٹانے کے حوالے سے سمری کاجائزہ لیاگیا، مزید وضاحت اور ضروری تحقیقات کے لیے اس ایجنڈے کو مؤخر کر دیا گیا۔ اجلاس میں جاری مالی سال کے دوران وزارت توانائی (پاور ڈویژن) کے ترقیاتی اخراجات کے لیے 6.859 ارب روپے کے تکنیکی ضمنی گرانٹ کی منظوری دی گئی۔
اجلاس میں پیٹرولیم ڈویژن کی جانب سے سمری پر غور کرتے ہوئے ای سی سی نے پاکستان ایل این جی لمیٹڈ (پی ایل ایل) اور سوکار ٹریڈنگ کے درمیان ایل این جی فریم ورک معاہدے میں مزید تین سال کی توسیع کی منظوری دے دی۔
یہ معاہدہ ابتدائی طور پر 2023 میں طے پایا تھا، جس کے تحت پی ایل ایل ضرورت کے مطابق سی مالیاتی ذمہ داری یا ‘ٹیک اور پے’ کی شرط کے بغیر ہر ماہ ایک ایل این جی کارگو خرید سکتا ہے،۔ توسیع کا مقصد موسمی ضروریات کے مطابق ایل این جی کی موزوں خریداری کو ممکن بنانا اور ملک کے لیے توانائی کے شعبے میں بہتر مالیاتی حل فراہم کرنا ہے۔
Short Link: https://urdu.app.com.pk/urdu/?p=564292
