اسلام آباد۔4ستمبر (اے پی پی):اینٹی نارکوٹکس فورس (اے این ایف) نے منشیات سمگلنگ کے خلاف ملک بھر میں کریک ڈاؤن کرتے ہوئے بھاری مقدار میں منشیات برآمد کرکے 5ملزمان کو گرفتار کرلیا۔ اے این ایف ترجمان کے بیان کے مطابق کراچی انٹرنیشنل کنٹینر ٹرمینل پر اے این ایف نے ایک بڑی کارروائی کے دوران دبئی سے بھیجے گئے کنٹینر سے بھاری تعداد میں شراب کی بوتلیں برآمد کرلیں۔
برآمد شدہ غیر ملکی شراب کی 8520 بوتلیں کراچی کی نجی کمپنی کے لئے بک کروائی گئیں تھیں۔موٹروے ٹول پلازہ اسلام آباد کے قریب اے این ایف نے 2 کارروائیوں کے دوران مسافر بس میں سوار 2 ملزمان سے مجموعی طور پر 2 کلو چرس اور 480 گرام آئس برآمد کی گئی۔ ٹوبہ ٹیک سنگھ میں مقامی رہائشی موٹر سائیکل سوار سے 6 پیکٹ چرس برآمدکرلی۔برآمدہ چرس کا مجموعی وزن 7 کلو 200 گرام ہے ۔یونیورسٹی روڈ پشاور پر ملزم سے 464 نشہ آور (ایکسٹیسی) گولیاں برآمدکی گئیں۔
ہنگو کے رہائشی ملزم نے یونیورسٹی کے طلباء کو منشیات فروخت کرنے کا اعتراف کیا۔باچہ خان انٹرنیشنل ایئرپورٹ پر مسافر کے پیٹ سے 86 ہیروئن بھرے کیپسول برآمدکئے گئے جنہیں لے کرخیبر کا رہائشی ملزم پرواز نمبر EK-637 کے ذریعے دبئی کے لئے روانہ ہو رہا تھا۔خیبر کے علاقے زخہ خیل میں 2 کارروائیوں میں سمگلنگ کے لئے چھپائی گئی 20 کلو چرس برآمدکرلی گئی۔ترجمان نے بتایا کہ تمام ملزمان کے خلاف انسدادِمنشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔
Short Link: https://urdu.app.com.pk/urdu/?p=386145
