اسلام آباد۔2دسمبر (اے پی پی):اینٹی نارکوٹکس فورس (اے این ایف) نے منشیات اسمگلنگ کے خلاف ملک گیر 14 کارروائیوں کے دوران 241 کلو سے زائد منشیات برآمد کر کے 5 خواتین سمیت 14 ملزمان کو گرفتار کر لیا ہے ۔ ترجمان اے این ایف کے مطابق علامہ اقبال انٹرنیشنل ایئرپورٹ لاہور پر خاتون کے بیگ سے 1 کلو 942 گرام آئس برآمد کی گئی، کراچی کی رہائشی مُلزمہ پرواز نمبر GF-0767 کے ذریعے بحرین کے لئے روانہ ہو رہی تھی۔ ملتان انٹرنیشنل ایئرپورٹ پر بذریعہ پرواز نمبر QR-617 قطر جانے والا مسافر خاتون سمیت گرفتار کر کے ساہیوال کے رہائشی ملزمان کے بیگ سے 855 گرام آئس برآمد کر لی۔
باچا خان انٹرنیشنل ایئرپورٹ پر مسافر کے ٹرالی بیگ سے 995 گرام آئس برآمدکی گئی، پشاور کا رہائشی مُلزم پرواز نمبر QR-601 کے ذریعے دوحہ کے لئے روانہ ہو رہا تھا۔اسی طرح ایک اور کارروائی کے دوران اسلام آباد میں واقع 26 نمبر چونگی کے قریب ساہیوال کے رہائشی دو ملزمان سے 1 کلو گرام آئس جبکہ خاتون کے قبضے سے 500 گرام چرس اور 250 گرام آئس برآمد کر لی گئی، اورنگی ٹاؤن کراچی میں دو خواتین کے قبضے سے 22 کلو 800 گرام چرس ، پتوکی ٹول پلازہ ملتان کے قریب گاڑی سے 9 کلو 600 گرام چرس برآمد کر کے ملزم گرفتار کر لیا گیا۔
کامل پور انٹرچینج فیصل آباد کے قریب بس میں سوار ملزم سے 3 کلو ہیروئن اور 1 کلو آئس برآمد کی گئی۔ اسی طرح چراغ آباد انٹرچینج فیصل آباد کے قریب ٹرک سے 46 کلو 800 گرام چرس برآمد کر کے دو ملزمان گرفتار کر لیا گیا۔ ڈائیوو بس ٹرمینل اوکاڑہ کے قریب موٹر سائیکل سوار ملزم سے 3 کلو 600 گرام چرس برآمد کی گئی، زخہ خیل خیبر میں دو مختلف کارروائیوں کے دوران 19 کلو چرس جبکہ پنجگور کے غیر آباد علاقے میں اسمگلنگ کے لئے چھپائی گئی 80 کلو گرام چرس برآمد کر لی گئی۔
ایک اور کارروائی کے دوران پسنی روڈ تربت کے علاقے میں چھپائی گئی 50 کلو چرس برآمد کر لی گئی۔ ترجمان کے مطابق گرفتار ملزمان کے خلاف انسدادِمنشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
Short Link: https://urdu.app.com.pk/urdu/?p=415839
