اسلام آباد۔14نومبر (اے پی پی):اینٹی نارکوٹکس فورس (اے این ایف) کی مُلک بھر میں منشیات کے خلاف کامیاب کارروائیاں جاری ہیں ۔ پیر کو اے این ایف ہیڈکوارٹر سے جاری بیان کے مطابق اے این ایف نے اسلام آباد انٹرنیشنل ایئرپورٹ پرنوشہرہ کے رہائشی ملزم کے پیٹ سے 66 آئس بھرے کیپسولز برآمد کئے ہیں ، ملزم دوحہ جا رہا تھا۔
دوسری کارروائی کے دوران اے این ایف نے بُرہان ٹول پلازہ پراٹک کے رہائشی ملزم سے1 کلوسے زائدافیون برآمد کرلی۔ تیسری کارروائی کے دوران باچہ خان انٹرنیشنل ائیرپورٹ پشاور پر بنوں کے رہائشی ملزم کے پیٹ سے 4 ہیروئن بھرے کیپسولز برآمد کئے، ملزم بحرین جا رہا تھا۔چوتھی کارروائی کے دوران کوئٹہ میں 2 ملزمان سے 6کلو چرس برآمد کئے۔
پانچویں کارروائی کے دوران نُوکنڈی سے 25 کلو ہیروئن، 10 کلو افیون، 74 کلو میتھ اور 21 کلو کرسٹل آئس برآمد کر لی ہے۔مُلزمان کیخلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے ۔
