راولپنڈی۔28فروری (اے پی پی):اے این ایف نے تعلیمی اداروں اور ملک کے مختلف شہروں میں منشیات سمگلنگ کے خلاف جاری کریک ڈاؤن کے دوران 7 کارروائیوں میں 5 ملزمان کو گرفتار کر لیا۔ اے این ایف ہیڈکوارٹر راولپنڈی سے جاری چوبیس گھنٹوں کی انسداد منشیات کارروائیوں کی تفصیلات کے مطابق تازہ کارروائیوں میں1 کروڑ 97 لاکھ روپے سے زائد مالیت کی 52.111 کلو گرام منشیات برآمد کی گئیں۔
راولپنڈی میں یونیورسٹی کے قریب ملزم سے 200 نشہ آور گولیاں برآمد کی گئیں۔کراچی میں کھارادر کے قریب موٹرسائیکل سوار کے قبضے سے 1.4 کلو گرام آئس برآمد کی گئی۔ ترجمان نے بتایا کہ گرفتار ملزمان نے تعلیمی اداروں کے طلبا کو منشیات فروخت کرنے کا اعتراف بھی کیا ہے۔ملتان انٹرنیشنل ایئرپورٹ پر دبئی جانے والے مسافر کے انڈرگارمنٹس میں چھپائی گئی 179 گرام چرس برآمد کی گئی ۔
پشاور انٹرنیشنل ایئرپورٹ پر دوحہ جانے والے مسافر کے ٹرالی بیگ سے 980 گرام آئس برآمد کی گئی۔لاہور میں کوریئر آفس کے ذریعے برطانیہ بھیجے جانے والے پارسل سے لیڈیز پرس میں چھپائی گئی 226 گرام ہیروئن برآمد کی گئی۔بلوچستان میں حب کے علاقے وندر سے 24 کلو گرام افیون اور 6 کلو گرام ہیروئن برآمد کی گئی۔
ایم ون موٹر وے اسلام آباد کے قریب ملزم کے قبضے سے 19.2 کلو گرام چرس برآمد کی گئی۔ ترجمان نے بتایا کہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
Short Link: https://urdu.app.com.pk/urdu/?p=567223
