لاہور۔8جولائی (اے پی پی):پی ڈی ایم اے پنجاب نے مختلف اضلاع میں 24گھنٹوں کے دوران بارشوں کے باعث ہونے والے نقصانات کی رپورٹ جاری کردی۔شدید بارش میں مخدوش و بوسیدہ مکانات گرنے کے باعث نقصانات رپورٹ ہوئے۔ مختلف حادثات میں 7 افراد جاں بحق اور 7 زخمی ہوگئے ۔ ترجمان پی ڈی ایم اے کے مطابق راولپنڈی میں مخدوش و بوسیدہ عمارت گرنے سے ایک بچہ جاں بحق ہوا،کلرسیداں میں نہاتے ہوئے 3 بچے ڈوبنے سے جاں بحق ہوئے۔ جاں بحق افراد میں ایک خاتون، 2 مرد اور 4 بچے شامل ہیں ۔مون سون بارشوں کے باعث 3 مخدوش و کچے مکانات متاثر ہوئے۔
ڈی جی پی ڈی ایم اے عرفان علی کاٹھیا نے زخمیوں کو بہترین طبی امداد فراہم کرنے کی ہدایات جاری کر تے ہوئے کہا کہ وزیراعلی پنجاب کی ہدایات کے مطابق شہریوں کے نقصانات کا ازالہ کیا جائے گا ۔جاں بحق افراد کے لواحقین کی حکومتی پالیسی کے تحت امداد یقینی بنائی جائے گی۔ڈی جی پی ڈی ایم اے پنجاب نے بتایا کہ مون سون بارشوں کا دوسرا سلسلہ 10 جولائی تک جاری رہے گا، شہریوں سے گزارش ہے کہ خراب موسم کی صورتحال میں احتیاطی تدابیر اختیار کریں۔
