فیصل آباد ۔ 01 جنوری (اے پی پی):مینگو ریسرچ انسٹیٹیوٹ آری کے ماہرین زراعت نے آم کے باغبانوں کو پودوں کی پیداواری صلاحیت بہتر بنانے کیلئے انہیں رواں ماہ جنوری کے دوران خوابیدگی کی حالت میں رکھنے کامشورہ دیا ہے تاکہ پودوں میں بڈ انڈکشن کا عمل مکمل ہو جائے۔ انہوں نے کہا کہ رواں ماہ کے دوران آم کے پودوں میں مناسب زہروں کے استعمال سے جڑی بوٹیوں کی تلفی بھی ضروری ہے۔
انہوں نے کہاکہ باغبان پودوں کے نیچے گہری گوڈی سے اجتناب کریں کیونکہ اس سے جڑیں زخمی ہونے کا خدشہ ہوتا ہے جس سے مختلف قسم کے جراثیم پودے کے اندر داخل ہو کر مختلف بیماریاں پھیلانے کا موجب بن سکتے ہیں اور اس طرح پودا یک دم مرجھاؤ کا بھی شکار ہو سکتاہے۔
انہوں نے کہاکہ پودے میں غیر ضروری بڑھوتری کو کنٹرول کرنے کیلئے پیکلوبیوٹرازول کا سپرے بھی انتہائی مفید ہے جو نہ صر ف آم کے پودے پر نئی آنیوالی پھوٹ کو چیک کرتا اور شاخوں کی پختگی میں مدد دیتا ہے بلکہ اس سے درست انداز میں بڈ انڈکشن بھی ہو جاتی ہے۔
Short Link: https://urdu.app.com.pk/urdu/?p=541401
