اسلام آباد۔28مارچ (اے پی پی):وفاقی وزیرخزانہ ومحصولات سینیٹر محمد اورنگزیب نے کہاہے کہ بجلی کی قیمتوں میں کمی سے مینوفیکچرنگ سیکٹر کو فروغ ملے گا اور برآمدات میں اضافہ ہو گا،نئے مالی سال کے وفاقی بجٹ میں ٹیکسوں کا دائرہ وسیع کرنے پر توجہ دی جائے گی، ریئل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا۔ انہوں نے یہ بات جمعہ کو چین میں باؤ فورم کے دوران عالمی اشاعتی و نشریاتی جریدے بلوم برگ کو انٹرویودیتے ہوئے کہی۔
وزیرخزانہ نے کہاکہ حکومت کی توجہ معیشت کو بہتر بنانے پر مرکوز ہے اور برآمدات کو بڑھانے کی حکمت عملی پر کام ہورہاہے۔ انہوں نے کہاکہ وزیر اعظم کی قیادت میں بجلی کے نرخوں میں کمی لانے کے اقدامات کئے جا رہے ہیں، اس حوالے سے جلد ہی وزیر اعظم کی طرف سے اعلان متوقع ہے، اس اقدام سے مینوفیکچرنگ سیکٹر کو فروغ ملے گا اور برآمدات میں اضافہ ہو گا۔
انہوں نے کہاکہ آنے والے وفاقی بجٹ میں ٹیکسوں کے دائرہ کارمیں تو سیع کرنے پر توجہ دی جائے گی، ریئل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا، ٹیکس بنیادوں کو وسعت دے کر مینوفیکچرنگ سیکٹر پر غیر ضروری ٹیکسوں کا بوجھ کم کرنا ہے کیونکہ یہ شعبہ اب تک ٹیکس کا بڑا حصہ ادا کر رہا ہے۔
وزیر خزانہ نے مہنگائی کے رجحانات پر اطمینان کا اظہار کرتے ہوئے کہاکہ مجموعی اور بنیادی مہنگائی کی سطح پر گہری نظر رکھی جا رہی ہے، اس سال کے دوران شرح سود میں مزید کمی متوقع ہے، شرح سود میں کمی سے اقتصادی ترقی کے لئے حالات مزید بہتر ہوں گے۔
وزیرخزانہ نے کہاکہ پاکستان بین الاقوامی بانڈمارکیٹ میں واپسی کیلئے اقدامات کررہاہے،ہمارا جاری کیلنڈر سال میں پہلا چینی یوان بانڈ جاری کرنے کا ارادہ ہے،یوان بانڈ کی مالیت 200 سے 250 ملین ڈالر کے درمیان ہوگی، بانڈ کا حجم اہم نہیں بلکہ فنڈنگ ذرائع میں تنوع مقصود ہے۔
اس فنڈ کا استعمال موسمیاتی تبدیلی سے متعلق منصوبوں کےلئےکیا جائے گا۔ انہوں نے کہاکہ اس اقدام کا مقصد امریکا، یورپ اور اسلامی سکوک کی روایتی منڈیوں سے ہٹ کر مالیاتی ذرائع کو متنوع بنانا ہے،یہ موزوں وقت ہے کہ پاکستان دنیا کی دوسری سب سے بڑی کیپٹل مارکیٹ سے فائدہ اٹھائے۔
Short Link: https://urdu.app.com.pk/urdu/?p=576961
