بجلی کے بلوں میں مزید کمی کرنے پر کام جاری ہے، بجٹ میں تنخواہ دار طبقے کو ریلیف دینے کے لئے پروگرام ترتیب دیا گیا ہے، وزیرخزانہ کی میڈیا سے گفتگو

اسلام آباد۔11اپریل (اے پی پی):وفاقی وزیرِ خزانہ محمد اورنگزیب نے کہا ہے کہ بجلی کے بلوں میں مزید کمی کرنے پر کام جاری ہے، آئندہ مالی سال کے بجٹ میں تنخواہ دار طبقے کو ریلیف دینے کے لئے پروگرام ترتیب دیا گیا ہے۔جمعہ کویہاں میڈیا سے غیررسمی گفتگو کرتے ہوئے وزیرخزانہ نے کہاکہ تنخواہ دار طبقے کے ریلیف کی تفصیلات آئی ایم ایف کے پاس لے کر جائیں گے، بجٹ سازی کے لئےسرکاری اور نجی دونوں شعبوں سے 98 فیصد تجاویز موصول ہو گئی ہیں، بجٹ تجاویز پر حکومت اور نجی شعبہ مل کر کام کر رہا ہے۔

وزیرخزانہ نے کہاکہ نجٹ تجاویز میں جن پر عمل درآمد نہ ہو سکا اس کی وجوہات متعلقہ شعبے کو بتا دی جائیں گی، بجٹ کو اسمبلی میں پیش کرنے سے پہلے متعلقہ شراکت داروں کو بتا دیا جائے گا کہ کن تجاویز پر عمل درآمد ہو سکتا ہے۔ انہوں نے کہاکہ یکم جولائی کے بعد بجٹ میں کوئی تبدیلی نہیں ہو گی ہمارا مقصد بجٹ پر عمل درآمد کے لئے زیادہ وقت دینا ہے۔آئی ایم ایف سے متعلق امور کا ذکر کرتے ہوئے انہوں نے کہاکہ امیدہے کہ آئی ایم ایف ایگزیکٹو بورڈ مئی میں اسٹاف سطح کے معاہدے کی منظوری دے گا،پاکستان نے آئی ایم ایف کی طرف سے دیے گئے تمام اہداف پورے کر لئے ہیں۔

انہوں نے کہاکہ تاجروں سے ٹیکس وصولی بہتر ہوئی ہے، تاجر دوست سکیم کو تاجروں سے ٹیکس وصولی سے نہ جوڑا جائے، ٹیکس پالیسی شعبہ اس کیلنڈر سال میں وزارتِ خزانہ کے ماتحت کام شروع کر دے گا۔انہوں نے کہاکہ حکومت ٹیکس کے نظام کوآسان اورشفاف بنارہی ہے، ٹیکس دہندگان کوسہولیات کی فراہمی میں پرعزم ہیں، ٹیکس دہندگان کے لیے ایسا فارم ترتیب دے رہے ہیں جو ہر فرد خود بھر سکے گا۔

Short Link: https://urdu.app.com.pk/urdu/?p=580610