لاہور۔3اپریل (اے پی پی):وزیر اعلی پنجاب مریم نواز نے کہا ہے کہ بجلی کے نرخوں میں کمی قوم کیلئے ایک قیمتی تحفہ ہے،حکومت ملک کو ترقی کی راہ پر گامزن کرنے کیلئے سرگرم عمل ہے،پنجاب حکومت وزیر اعظم کے تاریخی فیصلے کا خیر مقدم کر تی ہے۔جمعرات کے روز صدر مسلم لیگ (ن )محمد نواز شریف نے وزیرِاعظم محمد شہباز شریف اور انکی ٹیم کو بجلی کی قیمتوں میں تاریخی کمی پر خراجِ تحسین پیش کرتے ہوئے کہا کہ گھریلو صارفین کیلئے7.41 روپے فی یونٹ اور صنعتوں کیلئے 7.59 روپے فی یونٹ بجلی کی قیمتوں میں کمی عوام کیلئے بڑی سہولت ہے
تاریخ گواہ ہے کہ مسلم لیگ (ن) جب بھی اقتدار میں آئی ملک کو بحرانوں سے نکالا اور عوام کو حقیقی ریلیف دیا،پنجاب حکومت وزیر اعظم کے تاریخی فیصلے کا خیر مقدم کر تی ہے۔وزیر اعلی مریم نواز نے کہا کہ مسلم لیگ( ن) دن رات عوام کو ریلیف دینے میں مصروف ہے،بجلی کے نرخوں میں کمی معیشت اور صنعتوں کے فروغ کیلئے سنگ میل ثابت ہو گی ،عید کے موقع پرقوم کیلئے یہ ایک قیمتی تحفہ ہے۔انہوں نے کہا کہ وزیراعظم محمد شہباز شریف نے بجلی کے نرخوں میں نمایاں کمی سے عوام دوستی،دور اندیشی اور معاشی بصیرت کا ثبوت دیا ہے،ان کا فیصلہ محض پالیسی نہیں بلکہ ان کی عوام سے دوستی کا اظہار ہے،وزیرِاعظم محمد شہباز شریف صدر مسلم لیگ( ن )محمد نواز شریف کے وژن کو آگے بڑھا رہے ہیں۔
Short Link: https://urdu.app.com.pk/urdu/?p=578231
