برازیلیا۔29اگست (اے پی پی):برازیل نے امریکا کے 50 فیصد ٹیرف کے خلاف تجارتی جوابی اقدامات پر غور کے لیے باضابطہ عمل شروع کر دیا ہے۔ رائٹرز کے مطابق وزارت خارجہ کے حکام نے بتایا کہ حکومتی تجارتی ادارے کیمیکس کو ہدایت دی گئی ہے کہ وہ اس بات کا جائزہ لے کہ آیا امریکہ پر باہمی جوابی اقدام کے قانون کا اطلاق کیا جا سکتا ہے یا نہیں۔
یہ قانون رواں سال برازیلی کانگریس سے منظور ہوا تھا جس کے تحت ملک کو اختیار ہے کہ اپنی مصنوعات اور خدمات پر یکطرفہ اقدامات کی صورت میں جوابی محصولات اور دیگر اقدامات نافذ کرے۔وزارتی ذرائع کے مطابق صدر لوئز اناسیو لولا ڈا سلوا نے امریکا کے خلاف اس قانون کے استعمال کی منظوری دے دی ہے۔
کیمیکس کو 30 دن میں اپنی رپورٹ پیش کرنا ہوگی، جس کے بعد ایک حکومتی ورکنگ گروپ یہ فیصلہ کرے گا کہ کن شعبوں پر امریکی مصنوعات کو نشانہ بنایا جائے۔ امریکا کو اس عمل کے آغاز سے (آج) جمعہ کو آگاہ کیا جائے گا۔امریکا نے رواں ماہ برازیلی درآمدات پر 50 فیصد ٹیرف عائد کیا تھا۔ برازیلی حکام کا کہنا ہے کہ انہیں امریکی فریق کے ساتھ ٹیرف پر مذاکرات کا کوئی موقع فراہم نہیں کیا گیا۔
