تہران ۔21جولائی (اے پی پی):ایران نےخبردار کیا کہ برطانیہ، فرانس اور جرمنی کو تہران پر پابندیوں کی بحالی کے لئے سنیپ بیک میکانزم کو متحرک کرکے اقوام متحدہ کی سلامتی کونسل کی ساکھ کو مجروح نہیں کرنا چاہیے۔
شنہوا کے مطابق ایرانی وزیر خارجہ سید عباس عراقچی نے ایکس پر جاری پیغام میں کہاکہ ای تھری میں 2015 کے جوہری معاہدے کی شقوں یا اقوام متحدہ کی سلامتی کونسل کی قرارداد 2231 کی درخواست کرنے کے لئے "قانونی، سیاسی اور اخلاقی حیثیت” کا فقدان ہے کیونکہ یہ ایران کی طرف سے معاہدے کی عدم تعمیل کی صورت میں اس کے خلاف بین الاقوامی پابندیوں کے دوبارہ نفاذ کی اجازت دی گئی ہے۔
انہوں نے کہا کہ 2018 میں امریکا کے مشترکہ جامع پلان آف ایکشن سے دستبرداری کے بعد، ایران نے تدارک کے اقدامات کرنے سے پہلے تنازعات کے حل کے طریقہ کار کو ختم کر دیا جس کی وجہ یہ تھی کہ ای تھری اپنے وعدوں کا احترام کرنے میں ناکام رہا اور یہاں تک کہ امریکی "زیادہ سے زیادہ دباؤ” کی پالیسی کی حمایت کی۔
انہوں نے کہاکہ تینوں ممالک کو کسی بھی ایسے اقدام سے گریز کرنا چاہیے جس سے صرف سلامتی کونسل میں تقسیم بڑھے یا اس کے کام پر سنگین منفی اثرات مرتب ہوں۔ انہوں نے کہاکہ کہ ایران "بامعنی سفارت کاری” کے لئے تیار ہے، لیکن وہ مخاصمانہ اقدامات کی مزاحمت کرے گا۔اس سے قبل ایک میڈیا رپورٹ میں کہا گیا تھا کہ ایران اور ای تھری نے تہران کے جوہری پروگرام پر مذاکرات دوبارہ شروع کرنے پر اتفاق کیا ہے۔
