اسلام آباد۔17اپریل (اے پی پی):وزیر اعظم محمد شہباز شریف نے برطانیہ میں مقیم پاکستانی کمیونٹی کے کردار کو سراہتے ہوئے کہا ہے کہ وہ پاکستان اور برطانیہ کے درمیان پل کا کردار ادا کر رہی ہے۔ان خیالات کا اظہار انہوں نے برطانیہ کے پارلیمانی انڈر سیکرٹری برائے مذاہب ، کمیونٹیز اور آبادکاری لارڈ واجد خان سے گفتگو کرتے ہوئے کیا جنہوں نے جمعرات کو یہاں وزیر اعظم ہاؤس میں ان سے ملاقات کی۔ وزیر اعظم آفس کے میڈیا ونگ سے جاری بیان کے مطابق ملاقات کے دوران وزیراعظم نے لارڈ واجد خان کی پاکستان آمد پر ان کا خیرمقدم کیا اور اوورسیز پاکستانیز کنونشن میں شرکت پر ان کا شکریہ ادا کیا۔
وزیراعظم نے برطانیہ میں مقیم پاکستانیوں کے تعاون کو سراہا جو پاکستان اور برطانیہ کے درمیان ایک پل کا کردار ادا کر رہے ہیں۔ وزیر اعظم نے ہز میجسٹی کنگ چارلس سوم کے ساتھ ساتھ برطانوی وزیر اعظم کیئر اسٹارمر کے لئےبھی نیک خواہشات کا اظہار کیا۔ انہوں نے پاکستان برطانیہ کے درمیان تجارت، سرمایہ کاری، تعلیم اور عوامی تبادلوں اور دیگر شعبوں میں تعلقات کو مزید مضبوط بنانے کی پاکستان کی خواہش کا اعادہ کیا۔
وزیراعظم نے پاکستان اور برطانیہ تعلقات کو فروغ دینے اور تعاون کی نئی راہیں تلاش کرنے میں لارڈ خان کی کوششوں کو سراہا۔ ملاقات میں لارڈ واجد خان نے وزیراعظم کو اپنی حالیہ سرگرمیوں اور اقدامات سے آگاہ کیا جن کا مقصد پاکستان اوربرطانیہ کے درمیان تعلقات کو مزید فروغ دینا ہے۔
Short Link: https://urdu.app.com.pk/urdu/?p=583239
