اسلام آباد۔5مئی (اے پی پی):بین الاقوامی شہرت یافتہ ٹیکنالوجی ادارے برلینز گروپ نے پاکستان میں ٹیلی ویژن آڈینس میژرمنٹ میں انقلابی جدت کے لئے بولٹ لائیک سولوشنز پرائیویٹ لمیٹڈ کے آغاز کا اعلان کر دیا ۔ جاری بیان کے مطابق بولٹ لائیک کو پاکستان میں ناظرین کی پیمائش کے میدان میں باضابطہ طور پر داخلے کا موقع پیمرا سے لائسنس حاصل کرنے کے بعد ملا جو ایک پیشہ وارانہ اور مسابقتی بولی کے عمل کے ذریعے دیا گیا۔
پیمرا کے چیئرمین محمد سلیم نے یہاں منعقدہ تقریب میں کمپنی کو لائسنس پیش کیا۔ بولٹ لائیک جدید ٹیکنالوجی کی بنیاد پر میڈیا انڈسٹری کو ناظرین کی مکمل شفاف باریک بینی سے بھرپور اور حقیقی وقت میں ڈیٹا فراہم کرے گا جو فیصلوں کو زیادہ مؤثر بنانے میں معاون ہوگا، جدید آلات اور ڈیٹا انفرا سٹرکچر کی مدد سے یہ نظام پاکستان میں آڈینس میژرمنٹ کا ایک نیا پیمانہ متعارف کرائے گا۔ برلینز گروپ جو برطانیہ میں قائم ہے، دنیا بھر میں ٹیلی کام، انرجی اور ڈیٹا اینالیٹکس میں جدت کے لئے جانا جاتا ہے۔
میڈیا سیکٹر میں قدم رکھنے کے بعد اب برلینز کا مقصد تمام سٹیک ہولڈرز کو ناظرین کی پیمائش کے جدید اور با اعتماد حل فراہم کرنا ہے۔ بولٹ لائیک کے منیجنگ ڈائریکٹر کی حیثیت سے میڈیا انڈسٹری کے تجربہ کار رہنما فیصل پراچہ کو مقرر کیا گیا ہے جبکہ بلال قریشی، برلینز گروپ کے شریک بانی اور سی ای او چیئرمین کی ذمہ داریاں سنبھالیں گے۔بلال قریشی نے کہا کہ ہم نے ہمیشہ موجودہ نظام کو بہتر بنانے کا چیلنج لیا ہے، چاہے وہ ٹیلی کام ہو، انرجی اسٹوریج ہو یا ڈیٹا اینالیٹکس۔ بولٹ لائیک کے ذریعے ہم میڈیا میں معلومات کے حصول کے طریقہ کار کو تیز منصفانہ اور مستقبل کے تقاضوں سے ہم آہنگ بنا رہے رہے ہیں۔
تقریب میں فیصل پراچہ نے کہاکہ ہم پیمرا کے شکر گزار ہیں کہ ہمیں جدید، ٹیکنالوجی پر مبنی سسٹم متعارف کرانے کا موقع ملا۔ اس نظام کے ذریعے میڈیا سیکٹر کے تمام فریقین کو شفاف اور باریک سطح تک تجزیاتی ڈیٹا فراہم کیا جائے گا، جس سے بروقت اور درست فیصلے ممکن ہوں گے۔بولٹ لائیک آڈینس میژرمنٹ کے روایتی طریقوں سے ہٹ کر جدید اور معتبر نظام متعارف کرا رہا ہے، جو مکمل طور پر قابل بھروسہ شفاف اور ٹیمپر پروف ہوگا۔
اس میں ایسے نئے اور ہائی ٹیک پیپل میٹر شامل ہوں گے جو MEMS اور جدید آڈیو شناختی ٹیکنالوجی پر مبنی ہیں تاکہ شور والے ماحول میں بھی درست ناظرین کا ڈیٹا حاصل کیا جا سکے۔ یہ سسٹم حقیقی وقت میں آڈیئنس اور ریٹنگز کو ریکارڈ کرتا ہے جبکہ مستقبل میں اضافی فیچرز جیسے جذباتی تجزیہ اور ”سیکنڈ اسکرین انگیجمنٹ” کی صلاحیت بھی موجود ہوگی۔اس نظام کو ایسے تیار کیا گیا ہے کہ یہ ڈیجیٹل اور روایتی میڈیا دونوں پر آڈینس کے رویے کو یکساں طور پر ناپ سکے۔
بولٹ لائیک کا انفرااسٹرکچر، مشین لرننگ کے لیے تیار بین الاقوامی معیار کی پرائیویسی کے تقاضوں کے مطابق اور مکمل طور پر آڈٹ ایبل ہوگا۔اس کے ساتھ ایک تازہ قومی سروے کے ذریعے نمائندہ باؤس بولڈ پینل بھی تشکیل دیا جا رہا ہے تاکہ یہ نظام پاکستان کے ٹی وی ناظرین کی درست نمائندگی کر سکے۔ بولٹ لائیک کا یہ قدم نہ صرف پاکستان میں TAM کے مستقبل سے ہم آہنگ ہے، بلکہ اس شعبے کو جدید ٹیکنالوجی، شفافیت اور لچکداری کے ساتھ از سرنو متعین کر رہا ہے۔
Short Link: https://urdu.app.com.pk/urdu/?p=592759
