اسلام آباد۔28فروری (اے پی پی):وزیراعظم کے معاون خصوصی حذیفہ رحمان نے کہا ہے کہ بطور معاون خصوصی میرا انتخاب وزیراعظم کے مجھ پر اعتماد کا مظہر ہے اور یہ میرے لئے ایک عظیم ذمہ داری ہے ۔ جمعہ کو اپنے ایک بیان میں انہوں نے کہا کہ مجھے وزیراعظم پاکستان کی جانب سے وفاقی کابینہ میں شامل کئے جانے کا اعزاز حاصل ہوا ہے، جو وزیر اعظم کے مجھ پر بے پناہ اعتماد اور شفقت کا مظہر ہے۔
میں اپنے قائد میاں محمد نواز شریف اور وزیراعظم میاں شہباز شریف کا تہہ دل سے شکر گزار ہوں کہ انہوں نے مجھے بطور معاونِ خصوصی وزیراعظم و وزیر وفاقی کابینہ میں شامل کیا۔یہ منصب میرے لئے کسی اعزاز سے کم نہیں، کیونکہ یہ نہ صرف میری قیادت کی عنایت اور پارٹی کی امانت ہے بلکہ میرے پیارے علاقے ڈیرہ غازی خان کے عوام کا بھی مجھ پر قرض ہے۔
وزیراعظم صاحب مجھے جس بھی وزارت کی ذمہ داری دیں گے، میں اسے دیانت داری، محنت اور لگن کے ساتھ نبھانے کی ہر ممکن کوشش کروں گا۔ انہوں نے کہا کہ میری بھرپور کوشش ہوگی کہ اپنے علاقے ڈیرہ غازی خان کی محرومیوں کے ازالے اور یہاں پاکستان مسلم لیگ (ن) کے استحکام کے لیے دن رات محنت کروں۔اللہ تعالیٰ مجھے ملک و قوم کی بہترین خدمت کرنے کی توفیق عطا فرمائے اور میں اپنی قیادت اور جماعت کے وقار میں اضافے کا باعث بنوں۔
Short Link: https://urdu.app.com.pk/urdu/?p=567227
