اسلام آباد ۔ 17 ستمبر (اے پی پی) وفاقی وزیر مذہبی امور پیر نور الحق قادری سے عراق کے سفیر حامد عباس لفطہ نے جمعرات کو ملاقات کی۔ ترجمان وزارت مذہبی امور کے مطابق ملاقات کے دوران چہلم امام حسین کی موقع پر پاکستانی زائرین کی سہولت اور دیگر انتظامات پر مشاورت کی گئی۔ عراقی سفیر نے پیر نور الحق قادری کو مجوزہ زیارت پالیسی اور حفاظتی اقدامات سے آگاہ کیا۔ وفاقی وزیر نے کہا کہ عراقی حکومت ہر سال پاکستانیوں سمیت لاکھوں زائرین کی بہترین دیکھ بھال کرتی ہے، بغداد اور نجف ایئرپورٹ پر پاکستانی زائرین کی صحت اور حفاظتی اقدامات کا خیال رکھا جائے۔ انہوں نے کہا کہ زائرین کی سہولت کیلئے حکومتِ پاکستان بھی ایک جامع زیارت پالیسی بنا رہی ہے۔ عراقی سفیر نے کہا کہ چہلم امام حسین کے حوالے سے عراقی حکومت چند روز میں زیارت پالیسی سے آگاہ کرے گی۔ زیارات پالیسی میں زائرین کی صحت و سہولت کو بطور خاص مد نظر رکھا جائے گا۔
