اسلام آباد۔15مئی (اے پی پی):پاکستان پیپلز پارٹی کے مرکزی سیکرٹری اطلاعات ندیم افضل چن نے گورنر خیبرپختونخوا فیصل کریم کنڈی سے ملاقات کی ، ملاقات میں پارٹی کی میڈیا حکمت عملی پر تبادلہ خیال کیا گیا۔
گورنر ہائوس کی جانب سے جاری اعلامیہ کے مطابق یہاں ملاقات میں گورنر خیبرپختونخوا نے کہا کہ پاک بھارت جنگ میں پارٹی کے چیئرمین بلاول بھٹو زرداری نے جس جرات اور بصیرت سے ملک کے وقار کا انٹرنیشنل میڈیا پر دفاع کیا اور بھارتی پروپیگنڈے کو ناکام بنایا، وہ مثالی اور لاجواب تھا۔ انہوں نے کہا کہ پارٹی کے دیگر قائدین بھی اس حوالہ سے بہترین کردار ادا کر رہے ہیں۔
انہوں نے مرکزی سیکرٹری اطلاعات ندیم افضل چن کی محنت و لگن کو داد دی اور انہیں پارٹی کا قیمتی اثاثہ قرار دیا۔ اس موقع پر ندیم افضل چن نے گورنر خیبرپختونخوا کے کردار اور رویہ کو سراہا۔ انہوں نے کہا کہ بھٹو شہید کے وژن کے تکمیل کے لئے ہر پلیٹ فارم پر ہم اپنا کردار ذمہ داری اور ایمانداری سے ادا کریں گے۔
Short Link: https://urdu.app.com.pk/urdu/?p=597415
