کوئٹہ۔ 31 اگست (اے پی پی):ملک بھر میں سیلابی صورتحال کے بعد بلوچستان میں بھی محکمہ ایریگیشن ممکنہ سیلابی صورتحال سے قبل ہی متحرک ہوگئی ۔ چیف انجینئر کینالز ناصر مجید نے پٹ فیڈر کینال آر ڈی 418 سے آر ڈی 505 تک کینال کا دورہ کیا اور بنائے گئے فلڈ ایمرجنسی کنٹرول رومز اور آب کلانی میٹریل کا جائزہ لیا اور اس میں مزید اضافے کے احکامات دئیے ۔
آر ڈی 418 کے مقام پر سپرنٹنڈنگ انجینئر ایریگیشن سرکل نصیرآباد غلام سرور بنگلزئی نے انہیں حفاظتی انتظامات پٹ فیڈر کینال میں زرعی مقاصد کے لیے پانی کی ترسیل و دیگر درپیش مسائل کے متعلق آگاہی فراہم کی ۔ ایگزیکٹو انجینئر پٹ فیڈر کینال فرید احمد پندرانی ، ایگزیکٹو انجینئر کیرتھرکینال غلام مصطفیٰ چانڈیو ، سب ڈویژنل آفیسران امان اللہ گاجانی سیف اللہ بنگلزئی ، سب انجینئرز وسیم احمد بہرانی رحمت اللہ بنگلزئی عبدالنبی سمیت سہراب خان اور شعیب علی بھی موجود تھے ۔
چیف انجینئر کینالز ناصر مجید نے کہا کہ حالیہ تباہ کن بارشوں اور سیلابی صورتحال سے پنجاب بری طرح متاثر ہوا ہے ، پنجاب سے دریائوں کے سیلابی ریلے پنجند کے مقام پر جمع ہونگے ، پنجند کی گیارہ لاکھ کیوسک پانی کی کیپسٹی ہے ، پنجاب کے دریائوں کا پانی 2 ستمبر کو پنجند جبکہ 4 ستمبر کو گڈو کے مقام پر پہنچے گا جبکہ دریائے سندھ میں 9 لاکھ سے زائد پانی کی کیپسٹی کی گنجائش موجود ہے ۔
ان تمام امور کو مدنظر رکھ وزیر اعلیٰ بلوچستان میر سرفراز بگٹی کے احکامات کی روشنی میں صوبائی وزیر ایریگیشن میر محمد صادق عمرانی اور صوبائی سیکرٹری ایریگیشن صالح محمد ناصر کی ہدایت پر بلوچستان میں بھی محکمہ ایریگیشن کی جانب سے پیشگی حفاظتی اقدامات کیے جا رہے ہیں تاکہ ممکنہ ہنگامی صورتحال کو پیش نظر رکھتے ہوئے مفاد عامہ میں بہتر معنوں میں اقدامات کیے جائیں ۔
انہوں نے کہا کہ پٹ فیڈر کینال کیرتھرکینال اور ایریگیشن ڈرینج سسٹم پر فلڈ کنٹرول رومز قائم کئے گئے ہیں تاکہ تمام امور کی مانیٹرنگ کی جائے جبکہ تمام کنٹرول روم پر ہیوی مشینری اور اسٹاف کو الرٹ رکھا گیا ہے ، محکمہ ایریگیشن کی جانب سے بنائے گئے فلڈ ایمرجنسی پلان پر عملدرآمد کیا جا رہا ہے ۔
انہوں نے کہا کہ حکومت بلوچستان کی جانب سے پیشگی اقدامات کرنا عوام کے وسیع تر مفاد میں ہے ، سال 2010 کے سیلابی صورتحال کو مدنظر رکھ کر لوگوں کو سیلابی صورتحال سے محفوظ رکھنے کے لیے اقدامات کیے جا رہے ہیں۔ انہوں نے کہا کہ قدرتی آفت کا مقابلہ کسی صورت نہیں کیا جاسکتا مگر مانیٹرنگ کے عمل کو جاری رکھا جارہا ہے تاکہ بروقت اقدامات کرکے لوگوں کے جان و مال کو تحفظ فراہم کیا جائے ۔
