بلوچستان میں پہلی سوشل میڈیا پالیسی متعارف کرائی جارہی ہے،وزیراعلی سرفراز بگٹی

کوئٹہ۔ 19 اپریل (اے پی پی):وزیر اعلیٰ بلوچستان میر سرفراز بگٹی نے کہا ہے کہ دورِ حاضر میں سوشل میڈیا کی طاقت سے انکار ممکن نہیں،بلوچستان میں پہلی سوشل میڈیا پالیسی متعارف کرائی جارہی ہے۔ یہ بات انہوں نے وزیراعلی سیکرٹریٹ میں سوشل میڈیا انفلوئنسرز سے ملاقات کے دوران کہی۔

میر سرفراز بگٹی نےکہا کہ نوجوانوں کی درست رہنمائی وقت کی اہم ضرورت ہے،سوشل میڈیا کے ذریعے نوجوانوں کو گمراہ بھی کیا جارہا ہے۔ انہوں نے کہا کہ ریاست سب سے مقدم، گورننس میں خامیوں کی نشاندہی خوش آئند ہے۔ وزیر اعلیٰ بلوچستان نے کہا کہ مثبت تنقید کو قبول کریں گے، اصلاحات کے عمل کو تقویت دیں گے،سوشل میڈیا صارفین کے تحفظات و تجاویز کو پالیسی کا حصہ بنایا جائے گا۔

وزیر اعلیٰ بلوچستان نے کہا کہ نوجوانوں کو روزگار، تعلیم اور آگاہی کے مواقع دیے جائیں گے اور سوشل میڈیا کو بہتری کا ذریعہ بنائیں گے تاکہ منفی پراپیگنڈے کا راستہ روکا جا سکے۔ وزیر اعلیٰ نے کہا کہ بلوچستان کی مثبت تصویر اجاگر کرنے میں نوجوان کردار ادا کریں، انفلوئنسرز معاشرتی ہم آہنگی اور قومی یکجہتی کو فروغ دیں، نئے دور کے تقاضوں کے مطابق پالیسی سازی ناگزیر ہے۔

Short Link: https://urdu.app.com.pk/urdu/?p=584426