اسلام آباد۔29نومبر (اے پی پی):پیپلز پارٹی کے کم عمر ترین رکن قومی اسمبلی نوابزادہ جمال خان رئیسانی نے کہا ہے کہ بلوچستان کے عوام بالخصوص نوجوان پیپلز پارٹی کے لیے نہ صرف طاقت کا سرچشمہ بلکہ اس کے روشن مستقبل کی ضمانت بھی ہیں۔
پی پی پی کے 57ویں یوم تاسیس کے موقع پرجمال خان رئیسانی نے اپنے پیغام میں کہا کہ صدر مملکت و شریک چیئرمین آصف علی زرداری اور چیئرمین بلاول بھٹو زرداری کی دانشمندانہ قیادت اور دور اندیش فیصلوں نے بلوچستان کے عوام میں یہ یقین پیدا کیا ہے کہ پیپلز پارٹی ہی وہ واحد جماعت ہے جو ان کے مسائل کے حقیقی حل کی ضامن ہے۔
نوابزادہ جمال رئیسانی نے کہا کہ پیپلز پارٹی نے ہمیشہ بلوچستان کے عوام کو قومی دھارے میں شامل کرنے کی کوشش اور ان کے حقوق کے لیے آواز بلند کی ۔
انہوں نے کہا کہ چیئرمین بلاول بھٹو زرداری کی قیادت میں نوجوان نسل کو بھرپور مواقع فراہم کیے جا رہے ہیں تاکہ وہ اپنی صلاحیتوں کا لوہا منوا سکیں اور ملک کی ترقی میں اہم کردار ادا کریں۔
ا ن کا کہنا تھا کہ بلوچستان کے نوجوان جنہوں نے ہمیشہ مشکل حالات میں اپنی صلاحیتوں کا مظاہرہ کیا پیپلز پارٹی کے نظریے کے علمبردار ہیں، یہ نوجوان نہ صرف پارٹی کا قیمتی اثاثہ بلکہ مستقبل کے معمار بھی ہیں جو ملک کو ترقی اور خوشحالی کی طرف لے جانے میں پیش پیش ہوں گے۔
نوابزادہ جمال رئیسانی نےبلوچستان کے نوجوانوں کو یقین دلایاکہ پارٹی ہمیشہ ان کے ساتھ ہے اور ان کے مسائل کے حل کے لیے ہمیشہ کوشاں رہے گی۔ ان کا کہنا تھا کہ بلوچستان کا مستقبل روشن ہے اور یہ نوجوانوں کے عزم و حوصلے سے ہی ممکن ہو گا۔
