راولپنڈی ۔31اکتوبر (اے پی پی):بنوں کے علاقے بکاخیل میں خوارج کے خلاف دوران آپریشن بہادری سے لڑتے ہوئے جامِ شہادت نوش کرنے والے میجر عاطف خلیل ، نائیک آزاد اللہ اور لانس نائیک غضنفر عباس کو مکمل فوجی اعزازات کے ساتھ ان کےآبائی علاقوں میں سپرد خا ک کر دیا گیا ۔
آئی ایس پی آر کے مطابق میجر عاطف خلیل شہید کی نماز جنازہ میں کور کمانڈر راولپنڈی اور کور کمانڈر پشاور نے شرکت کی ۔ شہداء کی نماز ِ جنازہ اور تدفین میں اعلیٰ عسکری وسول حکام، پاک فوج کے جوانوں، شہداء کے لوحقین اور عمائدین علاقہ کی بڑی تعداد شریک تھی ۔ آئی ایس پی آر کا کہنا ہے کہ ہمارا عزم و حوصلہ بلند ہے اور شہداء کی یہ عظیم قربانیاں دہشتگردی کیخلاف جاری جنگ میں ہماری طاقت ہیں۔
