اسلام آباد۔8اپریل (اے پی پی):بینکوں کے ڈیپازٹس، قلیل المدتی قرضوں اور سرمایہ کاری میں فروری کے دوران سالانہ بنیاد پر اضافہ ریکارڈ کیا گیا ۔سٹیٹ بینک کے اعدادوشمارکے مطابق فروری میں بنکوں کے ڈیپازٹس کاحجم 30ہزار458ارب روپے ریکارڈ کیا گیا جو گزشتہ سال فروری کے مقابلے میں 9.2فیصد زیادہ ہے، گزشتہ سال فروری میں بینکوں کے ڈیپازٹس کا حجم 27ہزار886ارب روپے ریکارڈ کیا گیا تھا۔ جنوری کے مقابلے میں فروری میں بینکوں کے ڈیپازٹس میں ماہانہ بنیاد پر1.8فیصد کمی ریکارڈ کی گئی ۔
سٹیٹ بنک کے مطابق فروری کے اختتام پربنکوں کے قلیل المدتی قرضوں کا حجم 13ہزار973ارب روپے ریکارڈ کیا گیا جو گزشتہ سال فروری کے 12ہزار62ارب روپے کے مقابلے میں 16.8فیصد زیادہ ہے۔ جنوری کے مقابلے میں فروری میں بینکوں کے قلیل مدتی قرضوں میں ماہانہ بنیاد پر5.1فیصد کمی ہوئی ۔ فروری کے اختتام پربینکوں کی سرمایہ کاری کا حجم 31ہزار213ارب روپے ریکارڈ کیا گیا جو گزشتہ سال فروری کے 25ہزار449ارب روپے کے مقابلے میں 22.7فیصد زیادہ ہے۔جنوری کے مقابلے میں فروری میں بینکوں کی سرمایہ کاری میں ماہانہ بنیاد پر4فیصد اضافہ ہوا ۔
Short Link: https://urdu.app.com.pk/urdu/?p=579435
