اسلام آباد۔8جولائی (اے پی پی):بنگلہ دیش کے خلاف ٹی ٹوئنٹی سیریز کے لیے قومی ٹیم کا اعلان کردیا گیا ہے ۔پاکستان کرکٹ بورڈ (پی سی بی) کے چیف آپریٹنگ آفیسر (سی او او) سمیر احمد سید اور چیئرمین پی سی بی کے مشیر عامر محمود نے دورہ بنگلہ دیش کے لیے قومی ٹیم کا اعلان کیا ہے۔
پاکستانی سکواڈ میں کپتان سلمان علی آغا، عباس آفریدی، ابرار احمد، احمد دانیال، فہیم اشرف، فخر زمان، صائم ایوب اور حسین طلعت شامل ہیں۔دیگر کھلاڑیوں میں محمد حارث، صاحبزادہ فرحان، حسن نواز، خوشدل شاہ، سلمان مرزا، صفیان مقیم اور محمد نواز شامل ہیں۔بنگلہ دیش کےخلاف 3 ٹی ٹوئنٹی میچز کی سیریز کے لیے سینئر کھلاڑیوں بابراعظم، محمد رضوان اور شاہین شاہ آفریدی کو ایک مرتبہ پھر 15 رکنی سکواڈ میں جگہ نہیں ملی۔
فاسٹ باؤلرز سلمان مرزا اور احمد دانیال کو ٹیم میں شامل کیا گیا ہے جبکہ سپینر محمد نواز کی بھی واپسی ہوئی ہے،حارث رؤف اور شاداب خان انجری کے باعث سکواڈ سے باہر ہوگئے۔پاکستان کرکٹ ٹیم 16 جولائی کو ڈھاکہ کے لیے روانہ ہو گی۔ پاکستان اور بنگلہ دیش کے درمیان 3 ٹی 20 میچز 20، 22 اور 24 جولائی کو شیرِ بنگلہ کرکٹ اسٹیڈیم ڈھاکا میں کھیلے جائیں گے۔
بعد ازاں قومی اسکواڈ ویسٹ انڈیز کیخلاف ٹی 20 اور ون ڈے سیریز کھیلنے کے لیے امریکا اور پھر ویسٹ انڈیز جائے گا۔پاکستان اور ویسٹ انڈیز کے درمیان ٹی 20 سیریز کے تینوں میچز بالترتیب 31 جولائی، 2 اور 3 اگست کو امریکی ریاست فلوریڈا میں کھیلے جائیں گے۔ ٹی 20 سیریز کے اختتام پر قومی ٹیم، ون ڈے سیریز کے لیے ٹرینیڈاڈ کا رُخ کرے گی جہاں دونوں ٹیموں کے مابین 3 ون ڈے میچز 8، 10 اور 12 اگست کو شیڈول ہیں۔
