فیصل آباد ۔ 27 ستمبر (اے پی پی):فیصل آباد انسٹیٹیوٹ آف کارڈ یالوجی کے ماہر امراض قلب وکارڈیوویسکیولر سرجن ڈاکٹر اطہر رؤف رانا نے کہا کہ بچوں میں گلے کی خرابی بھی امراض قلب کا باعث بن رہی ہے اورگلے خراب ہونے سے بچوں میں امراض قلب کی شرح میں اضافہ ہو رہاہے حتیٰ کہ روزانہ فیصل آباد انسٹیٹیوٹ آف کارڈیالوجی میں 2سے3 ایسے بچے لائے جا رہے ہیں جو امراض قلب کا شکار ہیں اس طرح مذکورہ شرح کو کسی صورت نظرانداز نہیں کیاجاسکتا۔
اے پی پی سے بات چیت میں انہوں نے کہا کہ گلے کی خرابی جسے رومینک فیور بھی کہاجاتاہے کو اکثر اوقات والدین یا میڈیکل افسران معمولی مرض سمجھتے ہیں لیکن یہ بیماری معصوم بچوں کے دل کے والو خراب کرنے کا موجب بن رہی ہے جس سے نوبت سرجری تک بھی پہنچ سکتی ہے۔ انہوں نے کہاکہ والدین بچوں کے گلے خراب ہونے پر کسی غفلت کامظاہرہ نہ کریں اور بچوں کو فوری مستند ڈاکٹرز سے چیک کروایا جائے۔
انہوں نے کہاکہ بچوں کو بازاری چٹ پٹی، مصالحے دار، رنگین، پیک شدہ،جنک و فروزن فوڈزکھانے کو دینے سے گریز کرناچاہئے نیز تلی ہوئی،کھٹی، زیادہ ٹھنڈی یا بازاری آئس کریمیں، غیر معیاری مشروبات بھی بچوں کیلئے زہر قاتل ہیں اسلئے والدین اپنے بچوں کو سختی سے ایسی اشیاکے استعمال سے روکیں۔ انہوں نے کہاکہ دل کی بیماریوں سے بچاؤ کیلئے پرہیز، پیشگی تدارکی وحفاظتی اقدامات انسان کو دل کے عارضہ اور بڑی پریشانیوں سے بچا سکتے ہیں۔
Short Link: https://urdu.app.com.pk/urdu/?p=395246
