اسلام آباد۔20نومبر (اے پی پی):چیئرمین سینیٹ سید یوسف رضا گیلانی نے کہا ہے کہ بچے ملک و قوم کا قیمتی اثاثہ ہیں،بچوں کے حقوق کا تحفظ اور ان کا مستقبل محفوظ بنانا ہماری اولین ترجیح ہے۔
بدھ کو سینیٹ سیکرٹریٹ سے جاری بیان کے مطابق عالمی یوم اطفال کے موقع پر اپنے پیغام میں چیئرمین سینیٹ نے کہا کہ بچے ملک و قوم کا قیمتی اثاثہ ہیں۔بچوں کے حقوق کا تحفظ اور ان کا مستقبل محفوظ بنانا ہماری اولین ترجیح ہے۔بچے قوم کا مستقبل ہوتے ہیں۔چیئرمین سینیٹ نے کہا کہ یوم اطفال ہمیں بچوں کے حقوق کے تحفظ کے عزم کو مزید مضبوط کرنے کا موقع فراہم کرتا ہے۔
بچوں کو معیاری تعلیم، صحت اور بہترین تربیت فراہم کرنا ضروری ہے۔ پاکستان کے ہر بچے کو محفوظ اور روشن مستقبل دینے کے لئے پرعزم ہیں۔ بچوں پر تشدد اور جبری مشقت کو روکنے کے لئے مؤثر اقدامات اٹھائے جائیں۔ انہوں نے کہاکہ بچوں کے حقوق کی پاسداری کے لئے سماجی و سرکاری سطح پر تعاون ضروری ہے۔
ہر بچے کو بہتر زندگی اور مواقع فراہم کرنا ہماری قومی ذمہ داری ہے۔ بچوں کو محبت، احترام اور مواقع فراہم کر کے معاشرے کو مضبوط بنایا جا سکتا ہے۔ بچوں کا تحفظ، ان کی تعلیم اور صحت یقینی بنانا ہماری بنیادی ترجیحات میں شامل ہے۔
