لاہور۔22جنوری (اے پی پی):گور نر پنجاب چوہدری محمدسرور نے کہا ہے کہ بھارتی سازشوں کے خلاف پاکستانی سیاسی اور مذہبی جماعتوں کو متحد ہونا ہوگا ۔ پی ڈی ایم بھی سیاسی اور ذاتی نہیں ملکی مفادات کو تر جیح دے ۔ نر یندر مودی سے پاکستان میں استحکام اور ترقی ہضم نہیں ہو رہی ۔کشمیر میں بھارت کا دہشت گر د گروپوں کو کشمیریوں کیخلاف کھڑا کر نا انسانیت امن اور کشمیریوں پر حملہ ہے جس کے خلاف دنیا کو نوٹس لینا ہوگا ورنہ خطے میں امن ایک خواب بن جائے گا۔خطے میں آج بھی امن کو بھارت سے خطر ہ ہے۔جمعہ کے روز گور نر پنجاب چوہدری محمدسرور نے اپنے جاری بیان میں کہا کہ بھارت کی خطے میں بدامنی پھیلانے کی ہرروز ایک نئی سازش اور کوششیں بے نقاب ہو رہی ہیں ،افغان امن عمل کو سبوتاژکرنے کے مشن میں بھارت کی گریٹ ڈبل گیم کا انکشاف بھی نر یندر مودی اور بھارت کے اصل چہرے کو دنیا کے سامنے بے نقاب کر رہا ہے۔ انہوں نے کہا کہ وقت آچکا ہے کہ اقوام متحدہ سمیت دیگر عالمی ادارے بھارت کی دہشت گردی اور دہشت گردوں کو سپورٹ کر نے جیسے جرائم پر خاموشی اختیار کر نے کی بجائے بھارت کو روکیں کیونکہ خطے میں بھارت امن کا سب سے بڑا دشمن اور دہشت گردوں کا سہولت کار ہے۔گور نر پنجاب نے کہا کہ کوئی شک نہیں کہ بھارت داعش سمیت دہشت گردتنظیموں کا سہولت کار ہے ۔ انہوں نے کہا کہ کشمیریوں پر تمام تر مظالم کے باوجود بھارت کشمیر یوں کی تحر یک آزادی کو دبانے میں ناکام رہا ہے جسکی وجہ سے ا ب نئی سازش کے تحت بھارت کشمیر میں داعش اور دیگر دہشت گردوں کو کشمیریوں کے خلاف استعمال کر نے کی سازش کر رہا ہے انشاءاللہ بھارت کے تمام عزائم ناکام ہوں گے۔ انہوں نے کہا کہ وزیرا عظم عمران خان کی قیادت میں 22کروڑ پاکستانی کشمیر یوں کے ساتھ ہیں۔ چوہدری محمدسرور نے کہا کہ بھارت پاکستان کیخلاف سازشیں اور دہشت گردوں کا سہولت کاربن کر اپنے پاﺅں پر کلہاڑی مار رہا ہے۔ انہوں نے کہا کہ پاکستان کا دفاع مضبوط ہاتھوں میں ہے پاکستان کے پاس دنیا کی سب سے مضبوط افواج ہے اور بھارت جب بھی کوئی شرارت کر ے گا اس کو منہ توڑ جواب دیا جائے گا۔ انہوں نے کہا کہ بدقسمتی سے اقوام متحدہ سمیت عالمی طاقتوں کے ضمیر بھی مردہ ہوچکے ہیں بھارت کو کل نہیں آج ہی دہشت گرد ملک قرار دینے کاوقت آچکا ہے۔ انہوں نے کہا کہ اقوام متحدہ کو چاہئے کہ وہ فوری طور پر بھارت کو دہشت گر د ملک قرار دے۔
