اسلام آباد۔11دسمبر (اے پی پی):وزیر اعظم کی معاون خصوصی برائے انسانی حقوق مشعال حسین ملک نے کہا ہے کہ آج ایک بار پھر ہندوستان نے کشمیری قوم سے نفرت کا اظہار کیا ہے اور بھارتی سپریم کورٹ نے آرٹیکل 370 کی منسوخی کو آئینی قراردےدیا ہے، یہ فیصلہ جنیوا کنونشن اور اقوام متحدہ کی قراردادوں کے منافی ہے۔
ان خیالات کا اظہار معاون خصوصی مشعال ملک نے بھارتی سپریم کورٹ کے فیصلے کے حوالے سے اپنے ایک ویڈیو پیغام میں کیا۔ انہوں نے کہا کہ آج ایک بار پھر ہندوستان نے کشمیری قوم سے نفرت کا اظہار کیا ہے ، بھارت کا وزیراعظم ہو، بھارتی دہشت گرد فوج ہو یا عدلیہ کسی نے بھی کشمیریوں کو انصاف نہیں دیا۔
انہوں نے کہا کہ بھارت میں جنگل کا قانون ہے، بھارت نے آج اپنے ہی آئین کی خلاف ورزی کی ہے۔ مشعال حسین ملک نے کہا کہ بھارتی سپریم کورٹ کا فیصلہ جنیوا کنونشن اور اقوام متحدہ کی قراردادوں کے منافی ہے، مودی اور نیتن یاہو میں مقابلہ ہے کہ کون کتنا زیادہ قتل عام کرے گا۔
انہوں نے کہا کہ آر ایس ایس اور بھارتی دہشت گردی کا دائرہ پوری دنیا تک پھیل چکا ہے ۔ انہوں نے کہا کہ بھارت سے کشمیر تک کشمیریوں اور سکھوں کا قتل عام جاری ہے۔ مشعال ملک نے سوال اٹھایا کہ دنیا آخر کب جاگے گی؟ ، کشمیری اور کتنی قربانیاں دیں کہ اقوام عالم جاگے گا۔
Short Link: https://urdu.app.com.pk/urdu/?p=418884
