سرینگر۔20مئی (اے پی پی):غیر قانونی طورپربھارت کے زیر قبضہ جموں وکشمیر میں کل جماعتی حریت کانفرنس کے سینئر رہنما میر واعظ عمر فاروق نے کشمیریوں بالخصوص نوجوانوں کی مسلسل گرفتاریوں اور انہیں ہراساں کیے جانے پر سخت تشویش کا اظہار کیا ہے۔کشمیرمیڈیاسروس کے مطابق میرواعظ نے سرینگر میں جاری ایک بیان میں خبردار کیا کہ اس طرح کے جابرانہ اقدامات سے کشمیریوں کے زخم بھرنے کے بجائے مزید گہرے ہوں گے اور ان میں بھارت کے خلاف غم وغصے اور عدم اعتماد میں اضافہ ہو گا۔
انہوں نے قابض بھارتی حکام پر زور دیا کہ وہ ان جابرانہ اقدامات کا سلسلہ فوری طور پر ختم کریں اورکشمیریوں کے ساتھ مناسب رویہ اختیار کرے ۔میرواعظ نے کشمیری عوام سے بھی اپیل کی کہ وہ کل سرینگر میں مزار شہدا ء عیدگاہ کی طرف مارچ کریں اور ممتاز آزادی پسند رہنمائوں میرواعظ مولوی محمد فاروق ، خواجہ عبدالغنی لون اورشہدائے حول کو ان کے یومِ شہادت پر خراج عقیدت پیش کریں۔ اس موقع پرمقبوضہ جموں و کشمیراور آزاد جموں و کشمیر بھر میں سیمیناروں ،قرآن خوانی اور فاتحہ خوانی کی تقریبات منعقد کی جائیں گی ۔
میر واعظ مولوی محمد فاروق کو21مئی 1990کو سرینگر میں ان کی رہائش گاہ پر گولی مار کر شہید کر دیاگیا تھا، اسی روز سرینگر کے علاقے حول میں ان کے جلوس جنازہ پر بھارتی فوجیوں نے اندھا دھند فائرنگ کر کے ستر سوگواروں کو شہید کر دیا تھا۔ 12سال بعد21مئی 2002کو نامعلوم حملہ آوروں نے خواجہ عبدالغنی لون کو اس وقت شہیدکر دیا تھا جب وہ مزار شہداء سرینگر میں ایک اجتماع سے خطاب کے بعد واپس جا رہے تھے۔ ادھر بھارتی فورسز نے مقبوضہ جموں و کشمیر میں کریک ڈائون مزیدتیز کر دیا ہے جس سے کشمیریوں کے معمولات زندگی بری طرح متاثر ہو ئے ہیں۔ سرینگر، راجوری، پونچھ، سانبہ اور اودھمپور اضلاع میں آئے روز چھاپوں، جبری گرفتاریوں اور سخت نگرانی کی وجہ سے خوف ودہشت کا ماحول قائم ہے۔
راجوری میں ایک شہری محمد قاسم کو کالے قانون پبلک سیفٹی ایکٹ کے تحت گرفتار کیا گیاہے۔ مزید دو افراد محبوب اختر اور وشال شرما کے خلاف سانبہ اور اودھمپور اضلاع میں کالے قانون پبلک سیفٹی ایکٹ کے تحت مقدمات درج کئے گئے ہیں۔ 22اپریل سے مقبوضہ علاقے میں محاصرے اور تلاشی کی کارروائیوں اور گھروں پر چھاپوں کے دوران 3000سے زائد کشمیریوں کو گرفتار کیا گیا ہے۔لیفٹیننٹ گورنر منوج سنہا کی زیر قیادت قابض انتظامیہ نے مقبوضہ علاقے میں سی سی ٹی وی کیمروں کی تنصیب کا کام تیز کر دیا ہے۔
عوامی مقامات پر لگائے گئے ان کیمروں کا مقصد کشمیریوں کی نقل و حرکت کی چوبیس گھنٹے نگرانی کرنا ہے۔ادھر قابض حکام کی مجرمانہ غفلت کے باعث بڈگام کے علاقے بیروہ میں 8دن سے پانی کی بندش کے خلاف لوگوں نے احتجاجی مظاہرہ کرتے ہوئے ماگام روڈ کو بلاک کردیا۔ احتجاج کے باعث گھنٹوں تک ٹریفک متاثر رہی ۔
Short Link: https://urdu.app.com.pk/urdu/?p=599300
