اسلام آباد ۔ 8 اکتوبر (اے پی پی) بھارت کے ڈپٹی ہائی کمشنرآہلو والہ کو دفتر خارجہ میں طلب کر کے بھارتی فورسز کی طرف سے کنٹرول لائن پر جنگ بندی کی بلا اشتعال خلاف ورزیوں پرشدید احتجاج ریکارڈ کرایا گیا۔ترجمان دفتر خارجہ کے مطابق ڈائریکٹر جنرل(جنوبی ایشیاءو سارک) ڈاکٹر محمد فیصل نے منگل کوبھارتی ڈپٹی ہائی کشمنر گوروف آہلو والہ کو منگل کو دفتر خارجہ طلب کیا اور 6 اور7 اکتوبر کو بھارتی فورسز کی طرف سے کنٹرول لائن پر جنگ بندی کی بلا اشتعال خلاف ورزیوں کی شدید مذمت کی گئی۔ بھارتی فورسز کی جانب سے چیری کوٹ سیکٹر میں بلا اشتعال فائرنگ کے نتیجے میں 69سالہ ضعیف العمر خاتون نذیرہ بیگم زوجہ محمد حسین شہید جبکہ خاتون اور سمیت دیگر تین شہری زخمی ہوئے۔ ترجمان کا کہنا ہے کہ بھارتی فورسز ایل او سی اور ورکنگ باونڈری پر شہری آبادی کو مارٹر اور خودکار ہتھیاروں سے مسلسل نشانہ بنارہی ہے۔انہوں نے کہا کہ دانستہ طور پر شہریوں کو نشانہ بنانا افسوسناک اور انسانی وقار اور انسانی حقوق کے بین الاقوامی قوانین کی خلاف ورزی ہے۔ ترجمان نے کہاکہ بھارت کی طرف سے جنگ بندی کی خلاف ورزیوں سے علاقائی امن وسلامتی کو خطرہ ہے جو کسی تذویراتی غلط فہمی کا باعث بن سکتی ہیں۔ انہوں نے بھار ت پر زور دیا کہ وہ 2003 کے جنگ بندی معاہدے کا احترام کرے، جنگ بندی کی خلاف ورزیوں کے موجودہ اور دیگر واقعات کی تحقیقات کرائے، اپنی فورسز کو جنگ بندی کا حقیقی طورپر احترام کرنے کی ہدایت کرے اور کنٹرول لائن اور ورکنگ باونڈری پر امن برقرار رکھے۔
