اسلام آباد۔28ستمبر (اے پی پی):وزیر خارجہ شاہ محمود قریشی نے کہا ہے کہ بھارت مقبوضہ وادی میں آبادیاتی تناسب تبدیل کرنے کیلئے کوشاں ہے،برطانوی وزیر خارجہ کو مقبوضہ کشمیر میں بھارتی مظالم انسانی حقوق کی خلاف ورزیوں کے حوالے سے تفصیلی شواہد پیش کئے۔
منگل کو لندن میں برطانیہ کا تین روزہ دورے کے اختتام پر پریس کانفرنس سے خطاب کرتے ہوئے وزیر خارجہ نے کہا کہ برطانیہ اہم ملک ہے اور پاکستان اس کیساتھ تعلقات مزید مستحکم کرنے کا خواہاں ہے۔انہوں نےکہا کہ برطانوی ہم منصب کیساتھ ملاقات میں دو طرفہ تعلقات ،کشمیر اور افغانستان کی صورتحال پر بات ہوئی۔
انہوں نے کہ پاکستان اور برطانیہ کے مابین دو طرفہ تعلقات کی طویل تاریخ ہے۔برطانیہ کیساتھ تجارتی اور سرمایہ کاری تعلقات کو مزید فروغ دینے کیلئے اقدامات کئے جارہے ہیں۔انہوں نے کہا کہ پاکستان اور برطانیہ کے دفرمیان تعلقات کو مزید مستحکم کرنے کی غرض سے جوائنٹ ورکنگ گروپس کی تشکیل کے حوالے بھی برطانوی حکام سے بات ہوئی۔
انہوں نے کہا کہ مقبوضہ کشمیر میں بھارتی مظالم اور انسانی حقوق کی سنگین خلاف ورزیوں پر تشویش ہے۔انہوں نے کہا کہ میں نے برطانوی ہم منصب کو مقبوضہ کشمیر میں بھارتی مظالم کے حوالے سے تفصیلی شواہد فراہم کئے۔
وزیر خارجہ نے کہا کہ برطانیہ میں پاکستانی تارکین وطن کی کثیر تعداد مقیم ہے اور وہ برطانیہ کی ترقی اور خوشحالی میں اہم کردار ادا کر رہے ہیں۔
