نئی دہلی ۔19جنوری (اے پی پی):بھارت میں کورونا وائرس متاثرین کی تعداد ایک کروڑ5 لاکھ82ہزار تک پہنچ گئی، ملک کی مختلف ریاستوں اور مرکز کے زیر انتظام علاقوں میں مہلک وائرس سے اب تک ایک لاکھ52 ہزار5 سو سے زائد افراد لقمہ اجل بن چکے ہیں۔ منگل کو بھارتی ذرائع ابلاغ کے مطابق کورونا وائرس کے مریضوں کے اعتبار سے بھارت دنیا کا دوسرا سب سے زیادہ متاثرہ ملک ہے، ملک بھر میں کورونا وائرس سے متاثرہ افراد کی تعداد10582647ہے جبکہ بھارتی وزارت صحت کے اعداد و شمار کے مطابق ملک بھر میں کورونا وائرس کے فعال کیسز کی تعداد202202 ہے۔ حکام کے مطابق بھارت میں کورونا وائرس سے اب تک152593افراد ہلاک ہوئے ہیں۔ سرکاری اعداد وشمار کے مطابق بھارت میں مجموعی طور پر کورونا وائرس سے متاثرہ10227852افراد صحتیاب ہوئے ہیں۔ بھارت میں کورونا وائرس سے سب زیادہ متاثرہ ریاست مہاراشٹر ہے جہاں مہلک وائرس سے اب تک 50 ہزار سے زائد افراد ہلاک ہوچکے ہیں۔ ریاست مہاراشٹر کے علاوہ جو دیگر ریاستیں کورونا وائرس کی وبا سے شدید متاثر ہوئی ہیں ان میں تامل ناڈو، کرناٹک، آندھرا پردیش اور اتر پردیش شامل ہیں۔ بھارتی وزارت صحت کے اعلیٰ حکام کا کہنا ہے کہ بھارت میں کورونا وائرس کے مریضوں کی تعداد اور اموات میں گزشتہ چند ہفتوں کے دوران کمی آئی ہے۔ جنوبی ریاستوں تامل ناڈو اور کرناٹک میں کورونا وائرس سے مجموعی طور پر 24 ہزار افراد لقمہ اجل بن گئے ہیں۔
