اسلام آباد۔10مئی (اے پی پی):وفاقی وزیر اطلاعات و نشریات عطاء اللہ تارڑ نے کہا ہے کہ بھارت نے جارحیت میں پہل کی، پاکستان نے صرف اپنے دفاع میں جوابی کارروائی کی، بھارت کو خود پیچھے ہٹنا ہوگا، بھارت نے ہماری شہری آبادی کو نشانہ بنایا جبکہ ہم نے اخلاقیات اور ذمہ داری کا مظاہرہ کرتے ہوئے بھارت کی شہری آبادی پر حملے نہیں کئے، صرف بھارتی عسکری تنصیبات کو نشانہ بنایا۔ ہفتہ کو برطانوی نشریاتی ادارے ”بی بی سی“سے گفتگو کرتے ہوئے وفاقی وزیر اطلاعات نے کہا کہ پاکستان نہ جارح ہے، نہ ہی اشتعال انگیز، پاکستان ایک پرامن ملک ہے، بھارت نے رات کی تاریکی میں پاکستان کی شہری آبادی پر حملہ کیا جس میں معصوم بچوں، خواتین اور بے گناہ شہریوں کو شہید کیا گیا جن کا کسی تنازعہ سے کوئی تعلق نہیں تھا۔
وزیر اطلاعات نے کہا کہ گزشتہ رات بھارت نے ہماری کچھ عسکری تنصیبات کے قریب کارروائی کی۔ پاکستان نے اقوام متحدہ کے چارٹر کے آرٹیکل 51 کے تحت اپنے دفاع کا حق استعمال کرتے ہوئے جوابی کارروائی کی۔ ایک سوال کے جواب میں انہوں نے کہا کہ پاکستان نے انتہائی ذمہ داری کا مظاہرہ کرتے ہوئے بھارت کی شہری آبادی کو نشانہ نہیں بنایا۔
ہم نے صرف ان کی عسکری تنصیبات، عسکری ساز و سامان، ریڈارز اور فوجی اڈوں کو نشانہ بنایا کیونکہ یہ ہمارے جنگی اخلاقیات کا حصہ ہے، ہم جنگ میں بھی اصولوں کی پاسداری کرتے ہیں۔ بھارت کی جانب سے یہ الزام کہ پاکستان نے 400 ڈرونز مختلف بھارتی شہروں، مذہبی مقامات اور شہری علاقوں کی طرف بھیجے، کی سختی سے تردید کرتے ہوئے وزیر اطلاعات نے کہا کہ یہ بے بنیاد دعوے ہیں جن کا مقصد اصل صورتحال سے توجہ ہٹانا ہے۔ وفاقی وزیر اطلاعات نے کہا کہ گزشتہ شب ہمیں یہ رپورٹس بھی موصول ہوئیں کہ بھارت کی جانب سے کچھ میزائل امرتسر پر داغے گئے جہاں سکھ اقلیت آباد ہے۔ انہوں نے کہا کہ سکھ برادری ہمارے بہت قریب ہے، پاکستان میں ننکانہ صاحب، پنجہ صاحب اور کرتارپور جیسے سکھ برادری کے مقدس مقامات ہیں جن کا ہم تحفظ کرتے ہیں ۔
ایک سوال کے جواب میں وفاقی وزیر اطلاعات نے کہا کہ پہلگام کا علاقہ لائن آف کنٹرول سے تقریباً 200 کلو میٹر کے فاصلے پر ہے اور وزیراعظم محمد شہباز شریف نے خود کہا کہ ہم اس واقعہ کی غیر جانبدارانہ اور شفاف تحقیقات میں تعاون کے لئے تیار ہیں۔ انہوں نے کہا کہ پہلگام واقعہ کی ذمہ داری کسی تنظیم نے قبول نہیں کی اور نہ ہی بھارت نے اس بارے میں کوئی شواہد فراہم کئے۔ اس واقعہ کو پاکستان سے جوڑنے کا کوئی ثبوت موجود نہیں ہے۔ انہوں نے کہا کہ پہلگام واقعہ کے صرف دس منٹ بعد بھارتی پولیس نے ایف آئی آر درج کر دی اور جائے وقوعہ پر پولیس ڈیڑھ گھنٹے بعد پہنچی، ہم کہہ رہے ہیں کہ اس واقعہ کی تحقیقات ہونی چاہئیں تاکہ حقائق سامنے آئیں۔
انہوں نے کہا کہ جب مقبوضہ کشمیر میں سات لاکھ بھارتی فوجی تعینات ہیں تو یہ کیسے ممکن ہے کہ ایسے حملے ہو جائیں؟ جب اتنی بڑی فوج موجود ہو اور پھر پہلگام جیسا واقعہ ہو جائے تو یہ بھارت کی سکیورٹی اور انٹیلی جنس ناکامی ہے۔ ہم نے تحقیقات کی پیشکش کی لیکن بھارت نے کسی قسم کا ثبوت فراہم نہیں کیا اور پھر اس واقعہ کی آڑ میں پاکستان پر حملہ کر دیا جبکہ ہم دہشت گردی کے خلاف صف اول کی ریاست ہیں۔ ایک سوال کے جواب میں وفاقی وزیر اطلاعات نے کہا کہ موجودہ صورتحال میں پاکستان نے بہت تحمل کا مظاہرہ کیا، ہم نے پورے چار دن تک ضبط سے کام لیا لیکن بھارت نے ہماری شہری آبادی پر بلا اشتعال حملے جاری رکھے، ہم نے صرف اپنے دفاع کا حق استعمال کیا۔ بھارت چونکہ حملہ آور ہے، اس لئے پیچھے بھی خود بھارت کو ہٹنا ہوگا۔ انہوں نے کہا کہ بھارت نے پہلگام واقعہ پر کوئی شواہد فراہم نہیں کئے اور نہ ہی ہماری شہری آبادی پر حملوں کا جواز فراہم کیا۔
بھارت نے عورتوں اور بچوں پر حملے کئے، ہم نے اپنے دفاع کا حق استعمال کیا، اب بھارت پر ہے کہ وہ حالات کو بہتر کرے کیونکہ کشیدگی کا آغاز بھارت نے کیا، ہم نے صرف اپنا دفاع کیا ہے۔ ایک سوال کے جواب میں وفاقی وزیر اطلاعات نے کہا کہ پاکستان نے امریکہ، چین، سعودی عرب اور دیگر ممالک سے سفارتی رابطے کئے، امریکی وزیر خارجہ مارکو روبیو نے پاکستان کے نائب وزیراعظم اور آرمی چیف سے بات کی، سعودی وزیر مملکت برائے خارجہ امور بھی پاکستان کے دورہ پر موجود تھے۔
وفاقی وزیر نے کہا کہ بھارت سے کسی قسم کا براہ راست رابطہ نہیں ہوا اگر کوئی تازہ پیشرفت ہوئی تو فوجی ترجمان جلد اس سے آگاہ کریں گے۔ ایک سوال کے جواب میں وفاقی وزیر اطلاعات نے کہا کہ ہماری افواج لائن آف کنٹرول پر دفاعی پوزیشن میں موجود ہیں اور کئی دنوں سے الرٹ پر ہیں کیونکہ بھارتی حملے مسلسل ہو رہے ہیں، ہم نے جو بھی اقدام کیا وہ اپنے دفاع میں کیا۔
Short Link: https://urdu.app.com.pk/urdu/?p=595229
