ویلنگٹن ۔ 3 فروری (اے پی پی) بھارت نے نیوزی لینڈ کو پانچویں اور آخری ایک روزہ بین الاقوامی کرکٹ میچ میں 35 رنز سے شکست دے کر سیریز 4-1 سے اپنے نام کر لی، میزبان ٹیم 252 رنز کے ہدف کے تعاقب میں 44.1 اوورز میں 217 رنز بنا کر آئوٹ ہو گئی، بھارتی بائولرز کی عمدہ لائن و لینتھ بائولنگ کے سامنے کیویز کا کوئی بھی کھلاڑی متاثر کن کارکردگی کا مظاہرہ نہ کر سکا، جیمز نیشم 44 رنز بنا کر نمایاں رہے، یزوندرا چھاہل نے 3 محمد شامی اور ہرڈک پانڈیا نے 2، 2 وکٹیں لیں، امباتی رائیڈو نے 90 رنز کی اننگز کھیل کر ٹیم کی جیت میں اہم کردار ادا کیا، رائیڈو میچ اور محمد شامی سیریز کے بہترین کھلاڑی قرار پائے۔ اتوار کو ویلنگٹن میں کھیلے گئے پانچویں اور آخری ایک روزہ میچ میں بھارتی قائد روہت شرما نے ٹاس جیت کر پہلے بیٹنگ کا فیصلہ کیا تو مہمان ٹیم پہلے کھیلتے ہوئے 49.5 اوورز میں 252 رنز بنا کر آئوٹ ہو گئی، بھارتی ٹیم کی اننگز کا آغاز مایوس کن تھا اور 18 کے سکور پر اس کے 4 مستند کھلاڑی آئوٹ ہو کر پویلین لوٹ گئے، روہت شرما 2، شیکھر دھون 6، شبمان گل 7 اور دھونی 1 رن بنا کر آئوٹ ہوئے، اس موقع پر وجے شنکر نے امباتی رائیڈو کا ساتھ دیا، دونوں بلے بازوں نے پانچویں وکٹ میں 98 قیمتی رنز جوڑ کر ٹیم کا سکور 116 تک پہنچا دیا، یہاں پر شنکر 45 رنز بنانے کے بعد رن آئوٹ ہو گئے، اس کے بعد رائیڈو نے کیدر جادھو کے ساتھ مل کر ٹیم کا سکور 190 تک پہنچا دیا، یہاں پر رائیڈو جو کہ اچھی بیٹنگ کر رہے تھے 90 رنز کی دلکش اننگز کھیلنے کے بعد ہنری کی گیند پر کیچ آئوٹ ہو گئے، جادھو 34 رنز بنا کر چلتے بنے، ہرڈک پانڈیا نے جارحانہ بیٹنگ کرتے ہوئے حریف بائولرز کی خوب دھنائی کی، انہوں نے 22 گیندوں پر 5 چھکوں اور 2 چوکوں کی مدد سے 45 رنز کی اننگز کھیل کر ٹیم کی پوزیشن مستحکم کی، انہیں نیشم نے آئوٹ کیا، بھنشور کمار 6 اور محمد شامی ایک رن بنا کر آئوٹ ہوئے، میٹ ہنری نے 4، ٹرینٹ بولٹ نے 3 اور نیشم نے ایک وکٹ لی۔ جواب میں نیوزی لینڈ کی ٹیم مطلوبہ ہدف کے تعاقب میں 45ویں اوور کی پہلی گیند پر 217 رنز بنا کر پویلین لوٹ گئی، بھارتی بائولرز کی عمدہ بائولنگ کے سامنے کیویز کا کوئی بھی کھلاڑی خاطرخواہ کارکردگی کا مظاہرہ نہ کر سکا، نیشم 44 رنز بنا کر نمایاں رہے، کولن منرو 24، ہنری نیکولز 8، کپتان کین ولیمسن 39، روز ٹیلر 1، ٹام لیتھم 37، کولن ڈی گرینڈ ہوم 11، مچل سینٹنر 22، ٹوڈ ایسٹل 10 اور ٹرینٹ بولٹ ایک رن بنا کر آئوٹ ہوئے، میٹ ہنری 17 رنز بنا کر ناٹ آئوٹ رہے، یزوندرا چھاہل نے 3، شامی اور پانڈیا نے 2، 2 بھنشور کمار اور کیدر جادھو نے ایک، ایک کھلاڑی کو آئوٹ کیا۔
