بھارت نے پہلگام واقعہ میں پاکستان پر بغیر کسی ثبوت کے الزامات عائد کئے، بھارت خود اس واقعہ کا ذمہ دار ہے، اس کے پاس کوئی شواہد موجود نہیں جو اس کے الزامات کو ثابت کر سکیں، عطاء اللہ تارڑ

اسلام آباد۔1مئی (اے پی پی):وفاقی وزیر اطلاعات و نشریات عطاء اللہ تارڑ نے کہا ہے کہ بھارت نے پہلگام واقعہ میں پاکستان پر بغیر کسی ثبوت کے الزامات عائد کئے، بھارت خود اس واقعہ کا ذمہ دار ہے، اس کے پاس کسی قسم کے کوئی شواہد موجود نہیں جو اس کے الزامات کو ثابت کر سکیں۔

جمعرات کو عالمی نشریاتی ادارے سی این این کے مایہ ناز ٹاک شو "Becky Anderson” میں گفتگو کرتے ہوئے وفاقی وزیر اطلاعات نے پاکستان کا مقدمہ بہترین طریقے سے پیش کیا، بھارت کے پاس پہلگام واقعہ کے بارے میں ثبوت نہ ہونا اور پاکستان پر بے بنیاد الزامات لگانے پر انہوں نے بھرپور آواز اٹھائی اور افواج پاکستان کی دفاعی تیاریوں اور پیشہ ورانہ صلاحیتوں پر روشنی ڈالی۔

وفاقی وزیر اطلاعات نے عالمی سطح پر پاکستان کی پوزیشن کو واضح کرتے ہوئے کہا کہ ہمارے پاس مستند انٹیلی جنس اطلاعات تھیں کہ بھارت پاکستان پر حملہ کرے گا۔ انہوں نے کہا کہ ایک ذمہ دار ریاست ہونے کے ناطے اور اقوام متحدہ کی سلامتی کونسل کا غیر مستقل رکن ہونے کی حیثیت سے یہ ہمارا فرض ہے کہ یہ معلومات عالمی برادری سے شیئر کریں۔

وفاقی وزیر نے کہا کہ پاکستان ہمیشہ امن کا خواہاں رہا ہے اور اپنے دفاع کا حق محفوظ رکھتا ہے۔ انہوں نے کہا کہ پاکستان نے پہلگام واقعہ کی منصفانہ اور شفاف تحقیقات کی پیشکش کی تھی لیکن بھارت نے الزام تراشی جاری رکھی۔ بھارت نے ماضی میں بھی بغیر تحقیقات کے اس طرح کے الزامات پاکستان پر عائد کئے۔

انہوں نے کہا کہ بھارت یہ اصرار تو کرتا ہے کہ یہ حملہ سرحد پار سے تھا لیکن اس کے پاس اپنا یہ الزام ثابت کرنے کے لئے کوئی ٹھوس ثبوت موجود نہیں ہیں۔ بھارت کی حکومت اب تک کسی ایک گروپ کا تعین نہیں کر سکی جو اس واقعہ میں ملوث ہو۔ انہوں نے کہا کہ پاکستان نے اس واقعہ پر منصفانہ اور غیر جانبدارانہ تحقیقات کی پیشکش کی تھی۔

ایک سوال کے جواب میں وفاقی وزیر اطلاعات نے کہا کہ پاکستان اپنے دوست ممالک کے ساتھ رابطے میں ہے اور اس کی پوزیشن عالمی سطح پر واضح ہے۔ پاکستان نہ تو جارح ہے اور نہ ہی اشتعال دلانے والا ہے، کشیدگی میں اضافے میں پاکستان کا کوئی کردار نہیں۔ عطاء اللہ تارڑ نے کہا کہ پاکستان کی بہادر مسلح افواج مکمل طور پر چوکس ہیں اور کسی بھی جارحیت کا مقابلہ کرنے کے لیے تیار ہیں۔ انہوں نے کہا کہ پاکستان کے عوام پرعزم اور اپنے وطن کے دفاع کیلئے متحد ہیں۔

Short Link: https://urdu.app.com.pk/urdu/?p=591005