اسلام آباد۔25اپریل (اے پی پی):وفاقی وزیر اطلاعات و نشریات عطاء اللہ تارڑ نے کہا ہے کہ بھارت بوکھلاہٹ کا شکار ہو چکا ہے، بھارت نے پہلگام کا جھوٹا ڈرامہ رچایا، فالس فلیگ آپریشن کی شرمناک داستان سے بھارت کی عالمی سطح پر سبکی ہو رہی ہے، پہلگام واقعہ کی ایف آئی آر نے بھارت کا جھوٹا پروپیگنڈے کو بے نقاب کر دیا، یہ کیسا واقعہ ہے جس کی ایف آئی آر وقوعہ کے صرف 10 منٹ بعد درج کر دی گئی، بھارت نے فالس فلیگ آپریشن کو عالمی سطح کا معاملہ بنانے کی ناکام کوشش کی، بھارت کسی بھول میں نہ رہے، پاکستان پرامن ملک ہے لیکن کسی بھی مس ایڈونچر کا جواب دینا جانتا ہے۔
بیانیہ کی جنگ میں پاکستان کو سبقت حاصل ہوئی، پاکستانی ٹی وی چینلز، سوشل میڈیا صارفین اور صحافیوں نے یک زبان ہو کر بھارتی پروپیگنڈے کو بے نقاب کیا، بھارتی سینئر صحافی سوشل میڈیا پر رو رہے ہیں کہ بھارت کا بیانیہ ناکام ہو چکا ہے، پاکستان نے ہمیں کہیں کا نہیں چھوڑا۔ جمعہ کو پہلگام واقعہ کے حوالے سے خصوصی گفتگو کرتے ہوئے وفاقی وزیر اطلاعات نے کہا کہ پہلگام فالس فلیگ آپریشن کے بعد پاکستان کی نیشنل سکیورٹی کمیٹی نے بھارت کو بھرپور جواب دیا اور عملی اقدامات کئے، پاکستان کی فضائی حدود کو بھارتی طیاروں کے لئے بند کر دیا گیا، آج بھارت کے تمام اخبارات میں ہیڈ لائنز ہیں کہ پاکستان نے بھارت کے لئے اپنی فضائی حدود بند کر دی ہیں، بھارتی طیاروں کے لئے پاکستان کی فضائی حدود بند ہونے سے بھارت میں فضائی ٹکٹوں کی قیمتوں میں ہوشربا اضافہ ہوچکا ہے،
بھارت میں متعدد فلائیٹس منسوخ یا تبدیل ہوئی ہیں اور کچھ لمبے روٹس سے چل رہی ہیں۔ بھارت سے تجارت بھی مکمل طور پر بند ہے، کسی تیسرے ملک کے ذریعے بھی بھارت سے تجارت نہیں ہو سکتی۔ انہوں نے کہا کہ بھارت کے فالس فلیگ آپریشن کے بعد افواج پاکستان مکمل طور پر پرعزم ہیں، پاکستان کسی بھی جارحیت کا مقابلہ کرنے کے لئے مکمل طور پر تیار ہے۔ انہوں نے کہا کہ نیشنل سیکورٹی کمیٹی نے واضح کیا ہے کہ پاکستان پرامن ملک ہے مگر کسی مس ایڈونچر کا بھرپور جواب دینا جانتا ہے، فالس فلیگ آپریشن کی شرمناک داستان سے بھارت کی عالمی سطح پر سبکی ہو رہی ہے۔
وفاقی وزیر اطلاعات نے کہا کہ پاکستان کو ایک مرتبہ پھر بیانیہ کی جنگ میں سبقت حاصل ہوئی ہے، پاکستانی ٹی وی چینلز، صحافیوں اور سوشل میڈیا صارفین کا مشکور ہوں کہ انہوں نے یک زبان ہو کر بھارتی ایجنڈے کو بے نقاب کیا، بھارت کے سینئر صحافی سوشل میڈیا پر رونا رو رہے ہیں کہ بھارت کا بیانیہ ناکام ہو چکا ہے، بھارتی میڈیا اور بھارتی صحافیوں نے فالس فلیگ آپریشن کے حوالے سے جھوٹی خبریں پھیلائیں اور جب پاکستان نے جواب دیا تو اب انہیں چھپنے کی جگہ نہیں مل رہی۔ وفاقی وزیر اطلاعات نے کہا کہ بھارتی بیانیہ پیچھے رہ گیا ہے، بھارت میں یہ رونا رویا جا رہا ہے کہ پاکستان نے ہمیں کہیں کا نہیں چھوڑا۔
عطاء اللہ تارڑ نے کہا کہ بوکھلاہٹ میں بھارت نے ایک غلطی پر دوسری غلطی کی، پہلگام واقعہ کی ایف آئی آر عجلت میں درج کی گئی، ایف آئی آر میں لکھا ہے کہ ضلع اننت ناگ، پہلگام پولیس اسٹیشن، واقعہ دن ایک بجکر 50 منٹ پر شروع ہوا اور 2 بجکر 20 منٹ پر ختم ہوا اور ایف آئی آر 10 منٹ بعد 2 بجکر30 منٹ پر درج کر دی گئی، عقل کے اندھوں کو بھی پتہ ہے کہ اس قسم کے واقعات کی تحقیقات ہوتی ہیں، موقع کا جائزہ لیا جاتا ہے اور قانونی لوازمات پورے کئے جاتے ہیں، شواہد دیکھے جاتے ہیں، یہ کیسا واقعہ ہے جس کی ایف آئی آر وقوعہ کے10 منٹ بعد درج کر دی جائے، اس طرز کی ایف آئی آر مقامی پولیس سٹیشنوں میں معمولی جھگڑوں پر درج کی جاتی ہیں۔ وفاقی وزیر اطلاعات نے کہا کہ بھارت نے فالس فلیگ آپریشن کو بین الاقوامی سطح کا معاملہ بنانے کی ناکام کوشش کی، ایف آئی آر منظر عام پر آنے سے انڈیا کا پورا پروپیگنڈا بے نقاب ہو گیا ہے، انڈیا کا جھوٹ ایک بار پھر سامنے آ چکا ہے۔
پاکستان کو ایک مرتبہ پھر بیانیہ کی جنگ میں سبقت حاصل ہوئی ہے، بھارت بری طرح ایکسپوز ہو چکا ہے۔ انہوں نے کہا کہ بھارت نے عجلت میں قانون کو دیکھے بغیر یکطرفہ طور پر سندھ طاس معاہدہ معطل کرنے کا بیان دیا، پاکستان اس پر دو ٹوک کہہ چکا ہے کہ پانی پاکستان کی لائف لائن ہے اور پاکستان اس مسئلہ پر بھرپور طریقے سے جواب دے گا۔ عطا اللہ تارڑ نے کہا کہ بھارت اب پریشان اور بوکھلاہٹ کا شکار ہے اور بوکھلاہٹ میں اب جیلوں میں پاکستانی قیدیوں اور مقبوضہ کشمیر کے شہریوں کا ان کائونٹر کرنا شروع کر دیا ہے، اطلاعات آ رہی ہیں کہ بانڈی پورہ میں الطاف لالی اور اڑی سیکٹر میں محمد فاروق اور محمد دین کو جھوٹے ان کائونٹر میں شہید کیا گیا، بھارت فالس فلیگ آپریشن کی آڑ میں لوگوں کو گھروں سے اٹھا کر شہید کر رہا ہے۔
انہوں نے کہا کہ فالس ان کائونٹر کرنے سے بھارت کی بوکھلاہٹ مزید سامنے آ چکی ہے۔ بھارت پہلے بھی ایسے کام کرتا رہا ہے، بھارت نے پہلے پلوامہ واقعہ کی آڑ میں مقبوضہ جموں و کشمیر کی خصوصی حیثیت ختم کرنے کی کوشش کی، اس مرتبہ انہوں نے اس فالس آپریشن کی آڑ میں سندھ طاس معاہدہ ختم کرنے کی کوشش کی جو بری طرح ناکام ہوئی۔ وفاقی وزیر اطلاعات نے کہا کہ بھارت مت بھولے کہ پاکستان دہشت گردی کے خلاف جنگ میں فرنٹ لائن اسٹیٹ ہے، بھارت دہشت گردی کو ہتھیار کے طور پر استعمال کر کے مظلوم بننے کی کوشش کر رہا ہے،پاکستان میں دہشت گردی کے بھارت کے خلاف ناقابل تردید ثبوت موجود ہیں۔
وفاقی وزیر عطا اللہ تارڑ نے کہا کہ پاکستان نے دہشت گردی کے خلاف 80 ہزار جانوں کی قربانیاں دی ہیں، ہم دہشت گردی کے خلاف منظم اور متحد ہیں، دہشت گردی کے خلاف پاکستان کی کامیابیوں سے بوکھلا کر بھارت نے فالس فلیگ آپریشن کیا، ان کی بوکھلاہٹ کا اندازہ لگائیں کہ آج مدھیا پردیش میں ان کی اپنی فضائیہ نے غلطی یا تکنیکی خرابی کی وجہ سے اپنی ہی آبادی کو نشانہ بنا دیا، یہ اتنے اہل ہیں کہ اپنی ہی آبادی کو نشانہ بنا دیا۔ بھارتی فورسز کے پیشہ ورانہ امور زبوں حالی کا شکار ہیں۔
انہوں نے کہا کہ بھارت آپریشن سوئفٹ ریٹارٹ کو نہ بھولے، بھارتی پائلٹ کو پاکستان میں چائے کا کپ پلا کر واپس بھیجا گیا تھا۔ وفاقی وزیر اطلاعات نے کہا کہ بیانیہ کی جنگ میں پاکستان کو سبقت حاصل ہے، پاکستان ہر شعبے میں سبقت کی صلاحیت رکھتا ہے، پاکستان کی قوم متحد ہے، آپ کے شہری تو آپ پر الزامات لگا رہے ہیں۔ انہوں نے کہا کہ پاکستان پوری طرح متحد اور یک زبان کھڑا ہے، بھارت کے مذموم مقاصد کو پوری طرح ایکسپوز کر رہے ہیں اور کرتے رہیں گے۔
Short Link: https://urdu.app.com.pk/urdu/?p=588110
