بھارت کا کشمیر پرحملہ گیڈر بھبکیوں کے مترادف ہے،پوری قوم پاک فوج کے ساتھ کھڑی ہے،چوہدری محمدیاسین

مظفر آباد۔ 30 اپریل (اے پی پی):صدر پاکستان پیپلز پارٹی آزاد کشمیر چوہدری محمد یاسین نے کہا ہے کہ پاکستان اور آزادکشمیر کادفاع مضبوط ہاتھوں میں ہے،بھارت کا کشمیر پرحملہ گیڈر بھبکیوں کے مترادف ہے،پوری قوم پاک فوج کے ساتھ کھڑی ہے۔میڈیا سے گفتگو کرتے ہوئے انہوں نے کہا کہ پیپلز پارٹی کی بنیا د ہی مسئلہ کشمیر کی بنیاد پر رکھی گئی ،پیپلز پارٹی کی قیادت نے ہمیشہ تحریک آزادی کشمیر،استحکام پاکستان اور جمہوریت کی مضبوطی کیلئے قربانیاں دی۔

انہوں نے کہا کہ کشمیری عوام تکمیل پاکستان کی جنگ لڑرہے ہیں اور اس مقصد کے حصول کیلئے لاکھوں کشمیری اپنی جانوں کے نذرانے پیش کرچکے ہیں ، وہ وقت دورنہیں جب کشمیریوں کی دی ہوئی قربانیاں رنگ لائیں گی اور وہاں پر آزادی کا سورج طلوع ہو گا۔ انہوں نے کہا کہ سندھ طاس معاہدہ یکطرفہ معطل نہیں کیا جاسکتا، معاہدے میں لکھا ہے کہ اسے ختم کرنا ہے تو اتفاق رائے سے ہو گا، پانی 24 کروڑ پاکستانیوں کی لائف لائن ہے،پہلگام واقعہ کی آڑ میں بھارت ایسے اقدامات کر رہا ہے جو خطے کو جنگ کی طرف دھکیل رہے ہیں، اگر ہندوستان نے آبی جارحیت یا حملہ کرنے کی کوشش کی تو اسے بھرپور جواب دیا جائے گا۔

Short Link: https://urdu.app.com.pk/urdu/?p=590612