اسلام آباد۔7مئی (اے پی پی):چیئرمین سینیٹ سید یوسف رضا گیلانی نے کہا ہے کہ بھارت کی جانب سے بزدلانہ حملہ قابلِ مذمت اور شرمناک فعل ہے،بھارتی جارحیت خطے کے امن و استحکام کے لیے سنگین خطرہ ہے، بھارتی اقدام عالمی قوانین اور انسانی حقوق کی کھلی خلاف ورزی ہے،بدھ کو ایک بیان میں چیئرمین سینیٹ نے کہا کہ پاکستان پرامن ملک ہے مگر خودمختاری اور سرحدوں کے تحفظ کے لیے ہر سطح پر مؤثر جواب دینے کی صلاحیت رکھتا ہے،پوری قوم مسلح افواج پاکستان کے شانہ بشانہ کھڑی ہے،
سید یوسف رضا گیلانی نے کہا کہ ہماری بہادر افواج نے ہمیشہ ملکی سرحدوں کی حفاظت میں تاریخ ساز قربانیاں دی ہیں،دشمن کی ہر جارحیت کا منہ توڑ جواب دیا جائے گا،اس بار بھی دشمن کو جرات اور حوصلے سے جواب دیا جائے گا،پاکستان بھارت کی اشتعال انگیزی کا منہ توڑ جواب دینے کا حق رکھتا ہے تاکہ دشمن کو آئندہ ایسی مذموم حرکت کی جرات نہ ہو، چیئرمین سینیٹ سید یوسف رضا گیلانی نے کہا کہ عالمی برادری بھارت کی اشتعال انگیزی کا نوٹس لے، عالمی برادری خطے میں امن و امان کے لیے مؤثر کردار ادا کرےپاکستان ہر جارحیت کا جواب دینے کے لیے مکمل طور پر تیار ہے،قوم کا ہر فرد اپنی افواج کے ساتھ سیسہ پلائی دیوار بنا کھڑا ہے۔
Short Link: https://urdu.app.com.pk/urdu/?p=593771
