اسلام آباد۔27اپریل (اے پی پی):آل پاکستان انجمن تاجران کے مرکزی صدر اشرف بھٹی نے کہا ہے کہ پہلگام واقعہ کے بعد بھارت کے یکطرفہ اقدامات پر پاکستان نے بروقت اور مناسب رد عمل دیا ہے جس پر قومی سلامتی کمیٹی کو خراج تحسین پیش کرتے ہیں، بھارت کی جانب سے واقعہ کے فوری بعد بغیر کسی تحقیقات کے سندھ طاس معاہدے کو معطل کر دینے کا اعلان اس کے سوچے سمجھے منصوبے کا حصہ ہے۔
اتوار کو اپنے ایک بیان میں اشرف بھٹی نے کہا کہ بھارت کسی بھول کا شکار نہ رہے، پاکستانی افواج اور قوم اپنے ملک کے چپے چپے کا دفاع کرنا جانتی ہیں۔ بھارت نے ہمیشہ اشتعال پر مبنی اقدامات کے ذریعے خطے کا امن دائو پر لگانے کی کوشش کی ہے، بغیر تحقیقات کے پاکستان پر الزامات پر بھارت کو ساری دنیا میں سبکی کا سامنا کرنا پڑ رہا ہے۔
انہوں نے کہا کہ پاکستانی قوم اپنی بہادر افواج کی پشت پر ہیں اس لئے بھارت غلطی سے بھی کسی مس ایڈونچر کا خیال اپنے دل میں نہ لائے اور نریندر مودی اپنی سیاست کو بچائے کے لئے خطے کا امن دائو پر نہ لگائے۔
Short Link: https://urdu.app.com.pk/urdu/?p=588407
