بھکر۔ 29 اپریل (اے پی پی):حکومت پنجاب کےاحکامات کی روشنی میں ڈپٹی کمشنر محمد اشرف نے بورڈ آف انٹر میڈیٹ اینڈ سکینڈری ایجوکیشن سرگودہا کے زیر اہتمام پہلے سالانہ امتحانات کے پیشِ نظر ضلع بھکر میں ضابطہ فوجداری کی دفعہ 144نافذ کرنے کا حکمنامہ جاری کیا ہے جس کی رو سے امتحانی مراکز کے اردگرد سو گز کی حدود میں غیر متعلقہ افراد کے داخلہ پر پابندی عائد کردی گئی ہے ۔
امتحانی مراکز میں امیدوار اور ڈیوٹی پر مامور عملہ کو صرف متعلقہ ضروری دستاویزات کے ساتھ سنٹرز میں داخلہ کی اجازت ہو گی۔ علاؤہ ازیں ضلع بھر میں امتحانات کے لیے مختص ایریا میں ہر طرح کے عوامی اجتماع پر پابندی عائد ہوگی۔
امتحانی امیدوار اور ڈیوٹی پر مامور عملہ یا کسی بھی فرد کو امتحانی اوقات کار میں کتابیں ،گائیڈز،حل شدہ پیرز،متعلقہ مواد ڈیجیٹل ڈائری ،موبائل فون سیٹ اور اسلحہ لے کر جانے کی ہرگز اجازت نہیں ہوگی ۔مذکورہ پابندی کی خلاف ورزی پر حسب ضابطہ قانونی کارروائی عمل میں لائی جائے گی۔یادرہے کہ مذکورہ حکمنامہ 29 اپریل سے 25 مئی 2025 تک نافذ العمل رہے گا۔
Short Link: https://urdu.app.com.pk/urdu/?p=589682
