برسلز۔4فروری (اے پی پی):بیلجیئم میں پاکستانی سفارت خانے نے مقبوضہ جموں و کشمیر کے مظلوم عوام کے ساتھ غیر متزلزل یکجہتی کے اظہار اور ان کی حق خودارادیت کی جائز جدوجہد کی حمایت کے لیے یوم یکجہتی کشمیر کی مناسبت سے خصوصی سیمینار کا انعقاد کیا۔تقریب کے آغاز پرصدر مملکت، وزیر اعظم اور نائب وزیر اعظم و وزیر خارجہ کے پیغامات پڑھ کر سنائے گئے جن میں کشمیر کاز کے لیے پاکستان کے پختہ عزم کا اعادہ کیا گیا۔ ان پیغامات میں مقبوضہ کشمیر میں انسانی حقوق کی سنگین اور منظم خلاف ورزیوں کو اجاگر کیا گیا اور اقوام متحدہ کی سلامتی کونسل کی قراردادوں کے مطابق کشمیری عوام کے حق خودارادیت کے لیے پاکستان کی مستقل حمایت کا اعادہ کیا گیا۔
اس موقع پر ایک دستاویزی فلم کی نمائش کی گئی جس میں تنازعہ کشمیر کی تاریخ اور بھارتی قبضے کے تحت کشمیریوں کو درپیش مسلسل مشکلات کا گہرائی سے جائزہ پیش کیا گیا۔ سیمینار میں مقررین نے کشمیری عوام کی جرات اور قربانیوں کو خراج تحسین پیش کرتے ہوئے مسئلہ کشمیر اور فلسطین کے درمیان مماثلت پیش کی جو قبضے اور انسانی حقوق کی پامالیوں کے خلاف دیرینہ جدوجہد کی علامت ہے۔مقررین نے بھارت کے 5 اگست 2019 کے یکطرفہ اور غیر قانونی اقدامات کی شدید مذمت کرتے ہوئے انہیں اقوام متحدہ کی سلامتی کونسل کی قراردادوں اور بین الاقوامی قوانین کی صریح خلاف ورزی قرار دیا۔ انہوں نے بھارت سے مطالبہ کیا کہ وہ ان اقدامات کو واپس لے اور کشمیری عوام سے کئے گئے اپنے بین الاقوامی وعدوں کو پورا کرے۔
تقریب سے خطاب کرتے ہوئےبیلجیئم میں پاکستانی سفارتخانہ کے ناظم الامور فراز زیدی نے کشمیر کاز کے سیاسی، قانونی اور اخلاقی جواز پر زور دیا۔ انہوں نے کشمیری عوام کے لئے پاکستان کی غیر متزلزل حمایت کا اعادہ کرتے ہوئے اور اس عزم کا اظہار کیا کہ پاکستان ان کی حق خودارادیت کی منصفانہ جدوجہد میں ہرممکن مدد جاری رکھے گا۔فراز زیدی نے کشمیری عوام کی استقامت کا اعتراف کیا جن کی جدوجہد 1947ء سے جاری ہے اور انہوں نے اس کی حتمی کامیابی پر اعتماد کا اظہار کیا۔ انہوں نے بیلجیئم میں مقیم پاکستانی اور کشمیری تارکین وطن کی بین الاقوامی پلیٹ فارمز پر مسئلہ کشمیر کے بارے میں شعور اجاگر کرنے کے لئے انتھک کوششوں کی بھی تعریف کی۔
سیمینار میں پاکستانی تارکین وطن، کشمیری نمائندگان، ماہرین تعلیم، میڈیا پروفیشنلز اور دیگر مندوبین نے بھرپور شرکت کی۔ شرکا نے اجتماعی طور پر حق خودارادیت کے لئے کشمیریوں کی سات دہائیوں پر محیط جدوجہد کو اجاگر کرنے کے عزم کا اعادہ کیا۔یوم یکجہتی کشمیر منانے کے سلسلے میں سفارت خانے نے ایک ہفتہ طویل تصویری نمائش کا بھی اہتمام کیا جس میں مقبوضہ کشمیر میں انسانی حقوق کی سنگین صورتحال کو اجاگر کیا گیا۔
یہ نمائش کشمیریوں کے ساتھ جاری ناانصافیوں اور بین الاقوامی کارروائی کی فوری ضرورت کی واضح یاد دہانی کراتی ہے۔بیلجیئم میں پاکستانی سفارتخانہ کشمیری عوام کے حقوق کی وکالت کرنے اور تمام بین الاقوامی پلیٹ فارمز پر ان کی آواز بلند کرنے کے لئے پرعزم ہے۔
