پیرس۔21جولائی (اے پی پی):بیلجیئم کے سائیکل سوارٹم ویلنس نے ٹور ڈی فرانس سائیکل ریس کا 15وا ں مرحلہ جیت لیا۔ یہ ٹم ویلنس کی ریس میں پہلی سٹیج فتح ہے۔فرانس کے شمالی حصے کے ایک شہر للی سے ٹورڈی فرانس سائیکل ریس کا 112 ویں ایڈیشن جاری ہے ، جس میں دنیا بھر کی سائیکلنگ کی 23ٹیموں کے نامور سائیکل سوار ٹائٹل کے حصول کے لئے کوشاں ہیں۔ ٹور ڈی فرانس سائیکل ریس کے 15ویں مرحلے میں سائیکل سواروں نے فرانس میں موریٹ سے کارکاسن تک 169.3 کلو میٹر کا فاصلہ طے کرنا تھاجو پہاڑی رستے پر تھا۔
34سالہ بیلجیئم کے سائیکل سوارٹم ویلنس نے عمدہ سائیکلنگ کا مظاہرہ کرتے ہوئے 169.3کلومیٹر کا فاصلہ 3 گھنٹے ،34منٹ اور 9 سیکنڈز میں طے کرکے پہلی پوزیشن حاصل کی۔ بیلجیئم کے سائیکلسٹ وکٹر کیمپینارٹس نے دوسری جبکہ فرانسیسی سائیکل سوار جولین الافیلپ نے تیسری پوزیشن حاصل کی۔ ریس کا 12 واں مرحلہ جیتنے کے ساتھ ہی سلووینیاکے سائیکل سواراور ایونٹ کے دفاعی چیمپئن تڈیج پوگاآر نے تیسری مرتبہ یلوجرسی حاصل کرلی ہے جس پر تاحال ان کا قبضہ برقرار ہے۔
ٹور ڈی فرانس سائیکل ریس 21 مرحلوں پر محیط ہوگی جس میں سائیکل سوار 3338.8کلو میٹر کا سفر طے کریں گے ۔ ٹور ڈی فرانس سائیکل ریس میں 232 ٹیمیں ٹائٹل کے حصول کے لئے ایکشن میں ہیں ۔ ٹور ڈی فرانس سائیکل ریس 24 روز جاری رہنے کے بعد 27 جولائی کو اختتام پذیر ہوگی۔
ٹور ڈی فرانس سائیکل ریس میں ٹیم یواے ای ایمرٹس ایکس آر جی کے 26 سالہ سلوسینیا کے سائیکلسٹ تڈیج پوگاآر اپنے اعزاز کا دفاع کے لئے کوشاں ہیں ۔ ٹور ڈی فرانس سائیکل ریس کا پہلا ایڈیشن پہلی مرتبہ 1903میں ہوا جو فرانسیسی سائیکل سوار مورس فرانسس گارین نے جیتا تھا۔
