اسلام آباد۔7اپریل (اے پی پی):وفاقی وزیر مذہبی امور سردار محمد یوسف نے کہا ہے کہ بین المذاہب ہم آہنگی کے فروغ کے ذریعے خطے میں یگانگت ، اتحاد اور امن کو فروغ دیا جا سکتا ہے۔ یہ بات انہوں نے پیر کو اپنے دفتر میں قازقستان کے سفیر یرژان کِسٹافن سے ملاقات کے دوران کہی۔
انہوں نے وزارتِ مذہبی امور کے ذریعے برادر اسلامی ممالک سے تعلقات کو مزید فعال کرنے کے عزم کا اعادہ کرتے ہوئے کہا کہ گذشتہ دور حکومت میں بین المذاہب ہم آہنگی کے فروغ پر کافی کام کیا ہے، پارٹی پالیسی ،قائد نواز شریف اور وزیر اعظم شہباز شریف کی ہدایت پر تعلقات کے فروغ کا احیاء کر رہے ہیں۔ انہوں نے سفیر کی جانب سے قازقستان میں ہونے والی کانگریس آف کی ورلڈ لیڈرز میں شمولیت کی دعوت کا خیر مقدم کیا اور کہا کہ دونوں ملکوں کے مابین طلباء اور علمائے کرام کے وفود کا تبادلے چاہتے ہیں
جس سے عوامی سطح کے تعلقات کو مزید فروغ ملے گا۔ قازقستان کے سفیر یرژان کِسٹافن نے کہا کہ رواں سال اکتوبر میں صدر قازقستان کا دورہ پاکستان متوقع ہے، گزشتہ سال سنٹرل ایشیا میں قازقستان پاکستان کا سب سے بڑا تجارتی پارٹنر تھا، کوشش ہے کہ رواں سال قازقستان سے پاکستان کی براہ راست پروازیں دوبارہ شروع کی جائیں۔ انہوں نے بتایا کہ قازقستان کے کھلاڑیوں اور تاجروں کا ایک وفد جلد پاکستان آ رہا ہے، تاجروں کا وفد کراچی میں منعقدہ بزنس فورم میں شرکت کرے گا، پاکستان کے ساتھ باہمی تعاون کے متعدد معاہدوں پر دستخط کر رہے ہیں۔
Short Link: https://urdu.app.com.pk/urdu/?p=579162
