اسلام آباد ۔ 15 جون (اے پی پی)بین الپارلیمانی کرکٹ ورلڈ کپ کے لئے ارکان اسمبلی پر مشتمل پاکستانی ٹیم کا اعلان کردیا گیا،زین قریشی کپتان، علی زاہدنائب کپتان جبکہ امیر سلطان وکٹ کیپر ہوںگے، وزیراعظم سمیت ،وزرا ڈپٹی سپیکر سینیٹرز اور صوبائی ارکان اسمبلی کرکٹ ٹیم کا حصہ ہیںجبکہ اسپیکر قومی اسمبلی اسد قیصر کا کفایت شعاری کے پیش نظر پارلیمانی کرکٹ ٹیم کے اخراجات قومی خزانے سے ادا نہ کرنے کا بڑا فیصلہ کیا ہے۔ہفتہ کواسپیکر قومی اسمبلی نے منتخب کھلاڑیوں کو خط لکھا ہے، جس میںرہائش، سفری اور دیگر اخراجات ذاتی طور پر برداشت کرنے کی ہدایت کی گئی ہے، اسپیکر نے کہا ہے کہ کسی بھی کھلاڑی پر قومی خزانے سے ایک روپیہ بھی خرچ نہیں ہوگا۔قومی اسمبلی سیکرٹریٹ نے ارکان اسمبلی کو فی کس دو ہزار پاونڈ جمع کروانے کی ہدایت کر دی ہے۔ بین الپارلیمانی کرکٹ ورلڈ کپ 8 جولائی سے 15 جولائی تک لندن میں 8 ممالک کی پارلیمان پر مشتمل ٹیموں کے مابین کھیلا جائے گا۔
