دبئی ۔ 4 فروری (اے پی پی) انٹرنیشنل کرکٹ کونسل (آئی سی سی) کی تازہ ترین ون ڈے پلیئرز رینکنگ میں بلے بازوں میں پاکستانی بلے باز فخر زمان 2 درجے ترقی پا کر ٹاپ ٹین اور امام الحق 9 درجے ترقی کے ساتھ ٹاپ ٹونٹی میں شامل ہو گئے۔ بابر اعظم پانچویں نمبر پر موجود ہیں۔ باﺅلرز میں ٹرینٹ بولٹ 7 سیڑھیاں چڑھ کر تیسرے نمبر پر آ گئے جبکہ پاکستان کے شاہین شاہ آفریدی 38 درجے لمبی چھلانگ لگا کر 74ویں نمبر پر آ گئے۔ پیر کو آئی سی سی کی طرف سے جاری کردہ تازہ ترین ون ڈے پلیئرز رینکنگ کے تحت بلے بازوں میں ویرات کوہلی بدستور سرفہرست ہیں، روہت شرما دوسرے، روز ٹیلر تیسرے، جوروٹ چوتھے اور بابر اعظم پانچویں نمبر پر برقرار ہیں، ڈی کوک ایک درجہ اوپر چڑھ کر آٹھویں نمبر پر آ گئے، فخر زمان 2 درجے ترقی پا کر دوبارہ ٹاپ ٹین میں شامل ہو گئے، انہوں نے نویں پوزیشن سنبھال لی، دھون دو درجے تنزلی کے بعد دسویں نمبر پر چلے گئے، ہاشم آملہ 3 درجے بہتری پا کر 13ویں، امام الحق 9 درجے ترقی پا کر کیریئر بہترین 16ویں نمبر پر آ گئے، دھونی بھی 3 سیڑھیاں چڑھ کر 17ویں نمبر پر آ گئے، مارٹن گپٹل 6 درجے تنزلی کے بعد 19ویں نمبر پر چلے گئے، باﺅلرز میں جسپریت بمرا پہلے اور راشد خان دوسرے نمبر پر برقرار ہیں، کیوی فاسٹ باﺅلر ٹرینٹ بولٹ 7 درجے ترقی کے ساتھ دسویں سے تیسرے نمبر پر آ گئے، یزوندرا چھاہل ایک سیڑھی چڑھ کر پانچویں نمبر پر آ گئے، ربادا تین درجے تنزلی کے بعد ساتویں نمبر پر چلے گئے، حسن علی دو درجے گرنے کے بعد 14ویں، ڈیل سٹین ایک درجہ گر کر سولہویں نمبر پر چلے گئے، پاکستانی فاسٹ باﺅلر شاہین شاہ آفریدی 38 درجے لمبی چھلانگ لگا کر 74ویں نمبر پر آ گئے۔ آل راﺅنڈرز میں راشد خان بدستور پہلے نمبر پر براجمان ہیں۔
