دبئی۔ 17 فروری (اے پی پی) آسٹریلیا کے پیٹ کمنز انٹرنیشنل کرکٹ کونسل (آئی سی سی) کی تازہ ترین ٹیسٹ پلیئرز رینکنگ میں دنیا کے نمبر ایک بائولر بن گئے، وہ 13 برس بعد ٹاپ پوزیشن پر براجمان ہونے والے پہلے آسٹریلوی بائولر بن گئے ہیں، اس سے قبل 2006ء میں گلین میگراتھ نے یہ اعزاز حاصل کیا تھا، کمنز نے کگیسوربادا سے ٹاپ پوزیشن چھینی ہے، بلے بازوں میں ڈی کوک اور فاف ڈوپلیسی ترقی پا کر ٹاپ ٹین میں شامل ہو گئے، کوسل پریرا 58 درجے لمبی چھلانگ لگا کر 40ویں نمبر پر آ گئے، آل رائونڈرز میں جیسن ہولڈر بدستور سرفہرست ہیں۔ اتوار کو آئی سی سی نے تازہ ترین ٹیسٹ پلیئرز رینکنگ جاری کر دی جس کے تحت بلے بازوں میں ویرات کوہلی بدستور پہلے نمبر پر موجود ہیں، ڈی کوک 4 اور ڈوپلیسی 7 درجے ترقی کے ساتھ بالترتیب 8ویں اور 10ویں نمبر پر آ گئے، سری لنکن بلے باز دیمتھ کرونارتنے نے بھی ایک سیڑھی چڑھ کر ڈوپلیسی کے ساتھ دسویں پوزیشن شیئر کر لی، ہاشم آملہ تنزلی کے بعد 13ویں نمبر پر چلے گئے، ڈین ایلگر نے تنزلی کے بعد 16ویں پوزیشن حاصل کر لی، دنیش چندیمل ایک درجہ بہتری پا کر 27ویں نمبر پر آ گئے، ڈربن ٹیسٹ کے ہیرو کوسل پریرا نے 58 درجے چھلانگ لگا کر 40ویں پوزیشن سنبھال لی، دھنن جایا ڈی سلوا 6 درجے بہتری کے بعد 57ویں نمبر پر آ گئے۔ دوسری جانب بائولرز میں آسٹریلیا کے پیٹ کمنز نے ایک درجہ ترقی کے ساتھ ٹاپ پوزیشن پر قبضہ جما لیا، انہوں نے جنوبی افریقن فاسٹ بائولر رباد کو پہلی سے تیسری پوزیشن پر دھکیل دیا، جیمز اینڈرسن ایک سیڑھی چڑھ کر دوسرے نمبر پر آ گئے، ورنن فلینڈر چوتھے نمبر پر موجود ہیں، ڈونے اولیویئر 3 درجے بہتری کے ساتھ 22ویں، وشوا فرننڈو 26 درجے ترقی کے ساتھ 49ویں، کاسن راجیتھا 10 درجے چھلانگ لگا کر 59ویں نمبر پر آ گئے، آل رائونڈرز میں جیسن ہولڈر بدستور پہلے نمبر پر موجود ہیں۔
