سرگودھا۔ 12 جون (اے پی پی):کمشنر سرگودہا ڈویژن و ایڈمنسٹریٹر میونسپل کارپوریشن سرگودہا جہانزیب اعوان نے میونسپل افسران اور فیلڈ اسٹاف کو ہدایت کی ہے کہ وہ اپنی ذُمہ داریاں دیانتداری اور پیشہ ورانہ مہارت سے سرانجام دیں، مبینہ کرپشن پر زیرو ٹالرنس کی پالیسی کے تحت سخت کارروائی عمل میں لائی جائے گی۔ اُنہوں نے شہر میں تجاوزات کے خاتمے کے لیے بھرپور اور منظم آپریشن دوبارہ شروع کرنے کی ہدایت دیتے ہوئے کہا کہ بازاروں میں فٹ پاتھ مکمل طور پر خالی ہونے چاہییں۔ تجاوزات کسی صورت برداشت نہیں کی جائیں گی اور غفلت برتنے والے انسپکٹرز کے خلاف سخت ایکشن ہوگا۔ کمشنر جہانزیب اعوان نے کہا کہ وہ خود تمام برانچوں کی کارکردگی کی مانیٹرنگ کریں گے۔
جن علاقوں کو تجاوزات اور ریڑھی فری قرار دیا گیا ہے وہاں دوبارہ قبضہ یا غیر قانونی سرگرمی برداشت نہیں کی جائے گی۔ تمام فیلڈ ٹیموں کو اپنے اپنے علاقوں میں متحرک نظرآنا ہوگا اور ہر فرد کی انفرادی کارکردگی کا تفصیلی جائزہ لیا جائے گا۔ انہوں نے ہدایت کی کہ عوامی شکایات کا فوری ازالہ کیا جائے،سخت گرمی کے پیش نظر واٹر سپلائی کنکشنز بحال رکھے جائیں اور بازاروں سے چنگ چی رکشوں کے خاتمے کے لیے چیف آفیسر اور میونسپل آفیسر (ریگولیشن) مل کر موثرلائحہ عمل ترتیب دیں۔ کمشنر جہانزیب اعوان نے تمام فیلڈ اسٹاف پر زور دیا کہ وہ ادارے کے وقار، عوامی سہولت اور شہر کی خوبصورتی کو مقدم رکھتے ہوئے اپنی پیشہ ورانہ ذمہ داریاں پوری ایمانداری سے ادا کریں۔
اجلاس میں ڈپٹی کمشنر کیپٹن (ر) محمد وسیم ، چیف آفیسرایم سی حامد چھٹہ اور میونسپل افسران و انسپکٹرز شریک تھے۔
