وزیراعظم محمد شہباز شریف نے کہاہے کہ تربیت یافتہ سکائوٹس کاامن اور بحرانوں میں کردار اہمیت کا حامل ہے، پاکستان میں سکائوٹ تحریک سے نوجوانوں کو سکائوٹنگ کی اقدار کواپنانے اور قومی خدمت کے لئے خود کو وقف کرنے کی ترغیب ملے گی۔ وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار عالمی یوم سکائوٹس کے موقع پر اپنے پیغام میں کیا۔ وزیراعظم نے کہاکہ سکاؤٹس کے اس عالمی دن پر، میں پاکستان اور دنیا بھر کے سکاؤٹس کو دلی مبارکباد پیش کرتا ہوں کیونکہ آج کا دن ہم قیادت اور خدمت کے جذبے سے منا رہے ہیں جو پوری تحریک کی بنیاد ہے۔ ہر سال 22 فروری کو دنیا بھر میں سکاؤٹس، سکاؤٹنگ کی تحریک کے بانی لارڈ رابرٹ سٹیفنسن سمتھ بیڈن پاول کی خدمات کو یاد کرتےہیں۔
پاکستان بوائے سکاؤٹس ایسوسی ایشن کی تاریخ میں نمایاں کارکرگی باعث مسر ت ہے جو رواں سا ل اپریل میں 15 ویں نیشنل جمبوری کی تیاری کر رہی ہے۔ وزیراعظم نے کہاکہ وژن 2030 اور ورلڈ سکاؤٹ بیورو کے ایشیا پیسیفک ریجن کے ساتھ تعاون سے ایسوسی ایشن بین الاقوامی شراکت کو مضبوط بنانے، پاکستان کے لئے عالمی سطح پر بہترین اقدامات اور پاکستان کی عالمی سکائوٹنگ کیلئے خدمات کو اجاگرکیاجائےگا۔ وزیراعظم نے کہاکہ امن اور بحران میں تربیت یافتہ سکاؤٹس کا گراں قدر کردار رہا ہے۔ سکاوٹس، سکاؤٹنگ کے نصب العین کی جیتی جاگتی مثال ہیں۔ بابائے قوم قائداعظم محمد علی جناح نے سکاؤٹنگ کی اہمیت کا اعتراف کرتے ہوئے اس بات پر زور دیا تھا "ایک محفوظ، صاف ستھری اور ترقی یافتہ دنیا کی تعمیر کے لئے، ہمیں فرد سے شروعات کرنی چاہیے۔
آئیے ہم اسے (فرد کو) نوجوانی میں ہی تیار کریں اور اس کے اندر سکاؤٹنگ کے نصب العین کے مطابق اپنی ذات سے بالا تر ہوکر خدمت، سوچ، قول اور عمل میں پاکیزگی پیدا کریں۔ وزیراعظم نے کہاکہ مستقبل میں اس تحریک میں ہمیں جدید اور پرکشش اقدامات متعارف کرانا ہوں گے جو نوجوان چیلنجوں سے نمٹنے، تحریک و جدت کو فروغ اور کردار کو مضبوط بنانے میں مدد کریں۔ وزیراعظم نے کہا کہ میسنجر آف پیس جیسے اقدامات سکاؤٹس کو اتحاد، ہم آہنگی اور بامعنی سماجی اثرات کو فروغ دینے کے لئے ایک مضبوط پلیٹ فارم فراہم کرتے ہیں۔ وزیراعظم نے کہاکہ انہیں امید ہے کہ پاکستان میں سکاؤٹ تحریک یونہی فروغ پاتی رہے گی جس سے ہر لڑکے اور لڑکی کو سکاؤٹنگ کی اقدار کو اپنانے اور قوم کی خدمت کے لئے خود کو وقف کرنے کی ترغیب ملے گی۔
Short Link: https://urdu.app.com.pk/urdu/?p=564642
