ترقیاتی منصوبوں میں شفافیت یقینی بنائی جائے اور بروقت مکمل ہونا چاہیے،بلال یاسین

لاہور۔22مئی (اے پی پی):وزیراعلی پنجاب مریم نواز کی جانب سے فیصل آباد میں ترقیاتی منصوبوں اور اپنی چھت اپنا گھر پروگرام کی مانیٹرنگ کا ٹاسک ملنے پر صوبائی وزیر ہائوسنگ،اربن ڈویلپمنٹ و پبلک ہیلتھ انجینئرنگ بلال یاسین فیصل آباد پہنچ گئے۔صوبائی وزیر ہائوسنگ،اربن ڈویلپمنٹ و پبلک ہیلتھ انجینئرنگ کی زیر صدارت واسا، ایف ڈی اے کے جاری پراجیکٹس اور پی ایچ اے کے بیوٹیفکیشن پلان بارے ڈی سی دفتر کے کمیٹی روم میں اجلاس منعقدہوا۔ڈپٹی کمشنر کیپٹن(ر)ندیم ناصر و دیگر سرکاری محکموں کے افسران بھی اس موقع پر موجود تھے۔واسا، ایف ڈی اے، پی ایچ اے کے افسران کی جانب سے کام کی رفتار بارے تفصیلی بریفنگ دی گئی۔صوبائی وزیرنے جاری کاموں کی رفتار پر اظہار اطمینان کیا۔

صوبائی وزیر نے ملک پور نعمت آباد میں اپنی چھت اپنا گھر کے پروجیکٹ کا معائنہ کیا۔بلال یاسین اخوت کے دفتر بھی گئے چیئرمین امجدثاقب نے تنظیم کی جانب سے فراہم کئے جانے والے قرضوں بارے بریفنگ دی۔ان کا اس موقع پر کہنا تھاکہ اپنی چھت اپنا گھر پروگرام کے تحت رواں مالی سال کے اختتام تک صوبہ میں 40 ہزار گھروں کی تعمیر مکمل کر لی جائے گی۔اپنی چھت اپنا گھر پروگرام وزیراعلی پنجاب مریم نواز کا تاریخی اقدام ہے۔انہوں نے کہا کہ کم آمدن افراد کو اپنی چھت اپنا گھر پروگرام بارے زیادہ سے زیادہ آگاہی دی جائے تاکہ اپنے گھر کا خواب پورا ہو سکے۔انہوں نے کہاکہ ترقیاتی منصوبوں میں شفافیت یقینی بنائی جائے اور بروقت مکمل ہونا چاہیے۔

اپنی چھت اپنا گھر پروگرام وزیراعلی پنجاب کے دل کے قریب ہے اوروہ اسے روزانہ کی بنیاد پر مانیٹر کر رہی ہیں۔ اجلاس میں سابق اراکین صوبائی اسمبلی میاں طاہر جمیل، میاں منان، میاں عرفان منان،فقیر حسین ڈوگرحاجی اکرم انصاری، رانا علی عباس اور مہر حامد رشید کے علاوہ سرکاری افسران نے بھی شرکت کی۔دریں اثنا صوبائی وزیر ہاوسنگ نے فیصل آباد ڈویلپمنٹ اتھارٹی کے دفتر کا بھی دورہ کیا اور ایف ڈی اے میں اونر شپ کلیئرنس سرٹیفیکیٹ کے رئیل ٹائم اجرا کے سسٹم کا افتتاح کر دیا۔ اس سسٹم کے تحت پراپرٹی مالکان کی سہولت کیلئے آن سپاٹ اونر شپ کلیئرنس سرٹیفیکیٹ جاری ہوں گے۔

Short Link: https://urdu.app.com.pk/urdu/?p=600425