انقرہ۔17مارچ (اے پی پی):ترکیہ نے یورپی یونین سے برسلز میں ہونے والی امدادی کانفرنس سے پہلے شام پر عائد پابندیاں ہٹانے کا مطالبہ کیا ہے۔ العربیہ اردو کے مطابق ترک وزارت خارجہ کی جانب سے جاری بیان میں کہا گیا کہ ترکہ شام کی نئی انتظامیہ کے ساتھ شام میں اقتدار کی پر امن منتقلی کے لئے اس اقدام کو ضروری سمجھتی ہے۔
بیان میں مزید کہا گیا ہے کہ شام کی اقتصادی سلامتی ملک کے استحکام و سلامتی کے لئے ضروری ہے۔ اس مقصد کے لئے معاشی مواقع اور ملازمتیں پیدا کرنے کی ضرورت ہے نیز یہ پابندیاں غیر مشروط اور غیر معینہ مدت تک کے لئے ہٹائی جانی چاہییں۔ واضح رہے کہ یورپی یونین پیر کی شام سے نویں بین الاقوامی کانفرنس کی میزبانی کرے گی جس میں شام کی عبوری حکومت کو شرکت کی دعوت دی گئی ہے۔
کانفرنس کا مقصد 13 سال سے زائد عرصے تک خانہ جنگی سے متاثرہ ملک شام کی بحالی کے لیے بین الاقوامی حمایت حاصل کرنا ہے۔
Short Link: https://urdu.app.com.pk/urdu/?p=573343
