لاہور۔6اپریل (اے پی پی):غیر قانونی مقیم تارکین کے انخلا کی حکومتی مہم کے تحت انخلا کا عمل بلا تعطل جاری ہے۔ترجمان پنجاب پولیس کے مطابق انخلا مہم کے دوران 1336افراد کو متعلقہ اداروں کی مدد سے ملک سے ڈی پورٹ کیا جا چکا ہے،گزشتہ 24 گھنٹے کے دوران 2772سے زائد غیر قانونی مقیم غیر ملکیوں کو ہولڈنگ سنٹرز پہنچایا گیا۔
انہوں نے بتایا کہ 2810غیر قانونی مقیم غیر ملکی افراد پہلے سے ہولڈنگ پوائنٹس پر موجود جبکہ غیر قانونی تارکین کے انخلا کیلئے صوبہ بھر میں 46ہولڈنگ سنٹرز قائم کیے گئے ہیں۔ آئی جی پنجاب ڈاکٹر عثمان انور نے کہا ہے کہ تمام غیرقانونی مقیم غیر ملکی تارکین کو ہرصورت واپس بھجوایا جائے گا،غیر قانونی مقیم شہریوں کے پنجاب سے انخلا کے دوران سکیورٹی ہائی الرٹ ہے۔انہوں نے کہا کہ متعلقہ اداروں کے ساتھ کوآرڈینیشن سے تارکین وطن کو مخصوص پوائنٹس سے پنجاب کی حدود سے باہر منتقل کیا جا رہا ہے۔
ڈاکٹر عثمان انور نے کہا کہ منتقلی کیلئے ٹرانسپورٹ، لاجسٹکس، کھانے پینے سمیت دیگر انتظامات متعلقہ ضلعی انتظامیہ کی ذمہ داری ہے، آئی جی پنجاب نے سی سی پی او لاہور،تمام آر پی اوز اور ڈی پی اوز کو غیر قانونی مقیم تارکین کے انخلا کے عمل میں تیزی لانے کی ہدایت کرتے ہوئے کہا کہ اس سلسلہ میں سپیشل برانچ، سی ٹی ڈی، سکیورٹی ادارے، انٹیلی جنس بیسڈ انفارمیشن کے ذریعے غیر قانونی مقیم غیر ملکیوں کی نشاندہی کر رہے ہیں، آئی جی نے ہدایت کی کہ غیر قانونی مقیم غیر ملکی افراد کی میپنگ، سکینگ، سکریننگ کے مطابق چیکنگ کی جائے۔
انہوں نے کہا کہ انخلا کے عمل کے دوران انسانی حقوق کی پاسداری یقینی بنائی جا رہی ہے،تمام ریجنل اور ڈسٹرکٹ پولیس افسران انخلا کے عمل کے دوران ضلعی انتظامیہ، متعلقہ اداروں کے ساتھ مربوط کوآرڈینیشن رکھیں۔
Short Link: https://urdu.app.com.pk/urdu/?p=578787
